OLSEM pasin, ol pikinini i save was long ol samting bilong haus taim papa i no stap.

Bipo long papa i save goaut em i save askim ol pikinini long was long ol haus na ol arapela samting bilong famili olsem busgraun na wara.

Sapos papa i hariap long go na i no gat taim long tokim ol pikinini, tingting bilong ol pikinini yet bai tokim ol long wanem samting ol i mas mekim.

Long wankain wei, God, Papa bilong yumi long heven i putim yumi long was long ol samting bilong em.

Taim yumi kisim baptais na kisim skul bilong Jisas, yumi kamap pinis pikinini bilong em.

Ol tingting na wok yumi mekim i mas soim stap bilong Papa God.

Em long ol pasin bihainim 10-komandmen na bihainim laip Jisas i bin stap taim em i stap long graun.

Olsem na yumi ol pikinini bilong God i no ken paul long wanem samting yumi bai mekim.

Yumi mas soim Kingdom bilong God long stap bilong yumi, long pasin bilong honesti, jastis, integriti na pret long God.

Sampela bilong yumi em God i makim long kamap lida, sampela em long kamap wok manmeri. Tasol sapos yumi lida o wokmanmeri bilong God, yumi mas soim olsem yumi pikinini bilong em God.

Pasin nogut bilong yumi yet bai bagarapim luksave na laik em God i gat long serim Kingdom bilong em wantaim yumi.

Yumi mas soim olsem yumi pikinini bilong God antap.

“Orait na bai mi putim long Eliakim dispela longpela klos na let yu save putim olsem opisa bilong king, na em bai i kisim dispela wok nau yu holim. Na em bai i lukautim na bosim ol manmeri bilong Jesrusalem na bilong olgeta hap bilong Judea, na em bai i stap olsem papa bilong ol. Na bai mi putim long sol bilong en ol ki bilong haus bilong King Devit. Na wanem samting em i opim, i no inap wanpela man bai pasim na wanem samting em i pasim, i no inap wanpela man bai i opim (Aisaia 22: 21-22).”

Jisas i kam daun long graun, i dai na opim dua bilong yumi long go long heven. Na em i salim Holi Spirit i long strongim yumi.
Jisas, husat propet Aisaia 9: 6-7 i tokaut long em olsem, “...God Bikpela i gat olgeta strong na i gat bikpela laik tru long mekim gut long ol manmeri bilong en, olsem na em bai i mekim ol dispela samting i kamap.”

King Devit i bihainim olgeta tok bilong Bikpela Lord wantaim olgeta tingting, strong na pasin bilong em, olsem na God i laikim em tumas.

Profet Asaia i tok heven na graun i bilong Bikpela Lord na em i save long olgeta samting bipo long ol i kamap.

Taim manmeri i bihainim skul bilong God, ol bai lukim kaikai bilong pasin bilong ol.

Krais Jisas i Bikpela bilong yumi na long pen na dai bilong em i baim bek yumi na yumi olgeta i ken tokaut strong olsem yumi pikinini bilong God.

“Bikpela i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu. Bikpela i stap long Saion na bai em i mekim yu i bosim planti ples.

“Bikpela i sanap wantaim yu bilong strongim yu. Em bai i bekim rong bilong ol lain manmeri na long ples bilong pait na em bai kilim dai planti man, (Buk Song 110:1-2,5-6).
Yumi olsem pikinini bilong God i mas sanap strong na makim maus bilong em.