MENDI Daiosis long Sauten Hailans i wok long redi long holim wanpela protes mas egensim ol pasin nogut long laip egensim toktok bilong Sanguma.

Dispela de i save kamap long 10 Ogas long wan wan yia.

Donald Lippert, Bisop bilong Mendi Daiosis i tok planti hevi we laip i lus i save kamap long Papua Niugini na Mendi Daiosis i wanpela hap kain hevi i save kamap.

Em i tok long makim de ol lidaman na ol lain husat i bungim kain hevi bai kamap na givim tokok, na ol bai kamapim sampela pilai long soim kain sindaun we i save kamap long komyuniti.

Sentral Dineri bai go pas long dispela de.

Em i tok Daiosis i kisim helpim long Missio-Aachen, wanpela NGO grup, long kamapim Haus bilong Hop (House of Hope) bilong ol lain husat i bungim dispela hevi long go na stap.

Em i tok dispela haus i bilong ol i stap hap taim na bihain ol manmeri i go bek long komyuniti bilong ol o long hap we ol save ol bai stap seif.

Bisop Lippert i tok Daiosis i kisim sampela wik pinis long mekim awenes long ol manmeri i save long hevi bilong tok bilong Sanguma.