OL manmeri long graun i mas bihainim skul na pasin bilong Jisas long lukim gutpela sindaun, wanpela Evanjelikal Luteran Sios (ELC) pasto i tok.

Pasto Joshua Titus bilong Nasuapum Seket, Morobe Provins i mekim dispela tok long wanpela konprens bilong ol long stat bilong dispela mun.

Em i tok tingting na sindaun bilong manmeri i save bagarap taim ol i putim ol samting bilong dispela graun i go pas long laip bilong ol.

“Sapos yu laik stap gut yu mas kisim Jisas tru long laip,” Pasto Titus i tok.

“Tok bilong God em Jisas husat i Krais na Sevia bilong yumi.

“Yumi no ken gat tupela bel taim yumi bihainim Jisas. Dispela bai bagarapim yumi.”

Pasto Titus i tok tude Kristen bilip bilong yumi i bungim planti traim na olsem manmeri i mas luksave na sanap strong long bilip.

Em i bihainim Baibel rit long 1 Korin 3: 16 na i tok yumi haus holi bilong God na olsem yumi i mas lukautim laip bilong yumi.

Em i tok bilip bilong yumi long Jisas yet bai sevim yumi.

Em i strongim tingting bilong ol manmeri long skul Martin Luter i bin mekim.

Pasto Titus i tok long bilip bilong yumi long Jisas na long marimari bilong God yet bai kisim yumi i go long Kingdom bilong God.

ELC asisten bisop Reveren Lucas Kedabing i strongim bilip bilong ol manmeri tu na i tok taim manmeri i kisim baptais ol i kamap pikinini bilong God pinis.

Em i tok long laik na marimari bilong Papa, em i salim Jisas i kam daun na dai long yumi.

“Jisas i dai na mekim rot bilong yumi pinis long go long Papa,” Reveren Kedabing i tok.

“Yumi nau i mas bilip na soim ol arapela manmeri long Jisas Krais na skul bilong em.

“Yumi mas bungim ol salens long laip olsem Bikpela Jisas i karim diwai kros i go long Maunten Kalveri.”

Reveren Kedabing i tok taim yumi inap bungim ol traim, bilip bilong yumi bai kamap strong.