Mama bilong Paradise Praivet Haus Sik, Janet Roland Sios i kamap Opisa bilong Oda bilong Logohu.

Gavana Jeneral bilong Papua Niugini na mausman bilong Kwin bilong England, Gren Sif Bob Dadae i givim dispela awod long Janet Sios insait long Niu Yia Investa Seremoni we i bin kamap i no long taim i go pinis.    

Oda bilong PNG i gat tripela Oda. Namba wan em Oda bilong Logohu, namba tu em Oda bilong Star ov Melanesia na namba tri em Oda bilong Valour.

Oda bilong Logohu em i namba wan oda bilong PNG. Logohu em long tokples Motu na em i sanap long Bed ov Paradais pisin, opisal nesenel sain bilong PNG. Dispela oda i gat foapela renk. Oda bilong Sta ov Melanesia i gat wanpela level ol i kolim Kompanion bilong Sta ov Melanesia (CSM) na em i save i go long ol lain husat i givim gutpela bikpela sevis long PNG na Melanesia moa long 15 krismas.

Kompanion bilong Sta ov Melanesia awod i save bihainim Grend Kompanion bilong Logohu awod.

Janet Sios i kisim Oda bilong Logohu long ol sevis bilong en long akauntensi, bisnis menesmen na edvaisari sevis, MRDC na Paradise Private Haus Sik.

Janet na ol arapela 75 manmeri i kisim ol Logohu Awod bilong ol long Gavana Jeneral Dadae long Gavman Haus i no long taim i go pinis.

I gat 8-pela medol we i save luksave long ol manmeri husat i givim sevis i go long kantri na long komyuniti. Ol dispela medol em: Kros ov Medikol Sevis (CMS), Distinguis Militari Sevis (DMS) Distinguis Polis Sevis (DPS), Distinguis Koreksenel Sevis (DCS), Meritories Imejensi Sevis (MES) Meritories Pablik Sevis (MPS), Meritories Komyuniti Sevis (MCS) na Komendesen Medol bilong Veliuabol Sevis (CVS).

Inspekta Rebecca Ipai i kisim Nesenel Logohu Medol long gutpela sevis bilong en long Koreksenal Sevis.

Dispela kain seremoni bilong luksave na amamasim ol manmeri husat i givm sevis long komyuniti, kantri na Melanesia i save kamap tupela taim long wanpela yia.