LONG dispela jenerel ilekesen bilong Bogenvil  41 meri olgeta i resis.

Lida bilong Bogenvil Federesen bilong ol meri Celestine Tomi long Buka i bin tok em i gutpela tru long lukim planti meri i resis long dispela ileksen.

Mis Tomi yet tu i resis wantaim tingting bilong mekim moa nek bilong ol meri i kamap long ol level bilong mekim disisen.

Em i tok, “Mipela ol meri i wok strong tru long mekim wok go het bilong Bogenvil Pis Agrimen long wanem mipela I laikim pis i mas stap olgeta taim.”

“Mipela i laik promotim tu self-rilaiens o tingting bilong sanap na mekim wok mipela yet, na olsem pipel bilong Bogenvil mipela i laik lukim tu politikel independens bilong mipela tu,” Tomi i tok.

Em i tok moa olsem maski ol meri i gat kain kain tingting long wanpela na narapela, bikpela samting nau long dispela taim em long sanap wantaim na long dispela rot ol meri i ken bungim ol pipel, ol sios na ol divelopmen patna na wok bung wantaim long kamapim nupela Bogenvil.

Em i apil long ol meri tu long tingting gut na vot.

Mis Tomi i lusim wok lida bilong Bogenvil Federesen bilong ol Meri long resis long dispela ileksen.

Rosa Koian i raitim