GAVMAN i mas putim gutpela was long ol boda ples, wanpela sios lida i tok.

Giles Cote, Bisop bilong Daru Kiunga Daiosis long Westen Provins, i tok em i pret olsem manmeri long daiosis bilong em i ken kisim coronavirus (COVID-19) taim no gat man i stap long PNG Indonesia boda na was long go kam bilong ol manmeri.

Em i tokim Wantok Niuspepa i no longtaim i go pinis olsem provins bilong em na moa yet long kantri i no gat gutpela helt sistem long lukautim ol manmeri.

Em i tok inap long nau Papua Provins na Wes Papua i gat moa long 3000 COVID-19 keis na namba i wok long go antap yet.

Em i pret olsem taim i no gat sekyuriti opisa i stap long boda, sik inap kam insait na bagarapim ol manmeri.

“Olgeta taim mi save tingting planti olsem ol manmeri long daiosis inap kisim bagarap taim sik coronavirus i kam,” Bisop Cote i tok.

“Planti hap bilong provins i bus ples na no gat gavman opisa i stap long was long boda.

“No gat wanpela mak i stap tu long soim we boda i stap. Nogat tru na olgeta i bus ples.”

Bisop Cote i tok nau yet Katolik sios i wok long lukautim ol Papua na Wes Papua refuji husat i ranawe long ples bilong ol bikos long ami bilong Indonesia na ol i stap long Is Awin refuji kem.

Em i tok sios i save helpim ol refuji long kaikai, skul na helt sevis.

Em i amamas long ol foapela Memba bilong Palamen long Westen Provins long wok bung wantaim long dispela taim na moa yet long taim bilong COVID-19.

Em i tok memba bilong Not Flai, James Donald i wok gut wantaim sios long toktok long hevi bilong coronavirus.

Em i amamas nau long harim olsem Gavman aninit long Minista bilong Imaigresen na Boda Sekyuriti Westley Nukundj i no longtaim i go pinis i tokaut long kamapim moa ol boda pos na boda stesin long Westen Provins long was long bodi bilong PNG.

Paul Zuvani i raitim