PRESIDEN bilong PNG Women Chamber of Commerce and Industry (PNGWCCI) Avia Ta’ita Koisen i singaut long Praim Minista James Marape long kisim hevi bilong GBV na sanapim wanpela sekretriet long lukluk gut long ol hevi bilong Jenda Bes Vailens o GBV long Tok Inglis.

Mis Koisen em i wanpela loya. Em i tok streteji bilong gavman long GBV 2016-2025 we Dipatmen bilong Komyuniti Divelopmen na Rilijen i lonsim i mekim rekomendesen long gavman i mas sanapim wanpela sekreteriet bilong GBV. Insait long dispela sekreteriet olgeta seksen long pablik na praivet sekta long wok long stretim hevi bilong GBV.

Mis Koisen i singaut strong nau long Marape-Steven Gavman long lukluk bek long dispela GBV streteji na sanapim dispela sekreteriet.

Dispela singaut i kam long taim  we wanpela yangpela meri, Jenelyn Kennedy i kisim bikpela bagarap long han bilong man bilong em na em i dai.

PNGWCCI i laikim gavman long luksave olsem GBV em i kamap bikpela kraim, Mis Koisen i tok.

PNGWCCI i bin stat long 2013 na i gat 5,000 meri memba. Em i wok olsem wanpela sivil sosaiti na em i skulim ol meri long pasin bilong lukautim mani na sanap strong wantaim mani bilong ol. Dispela i givim pawa long ol meri i ken mekim ol disisen long laip bilong ol. Na wanpela dispela ol disisen em long lusim ol rilesensip we i wok long bagarapim ol.

“Taim bilong kisim rait eksen na stretim dispela kraim em i abrus pinis. Sori tru, i luk olsem Jenda Bes Vailens em i kamap olsem nomol prektis pinis insait long PNG. Ol namba i no long taim i go pinis i soim olsem bikos long GBV ol wokfos insait long sampela lokal kampani i no kamapim gut wok long mak bilong 65 pesen.

“Yumi mas kalap no gut long dispela namba long wanem em i bagarapim tu mani i kam insait long ol kampani husat i save baim takis long kantri.

“Na em i no gutpela tru tu long wanem dispela hevi bilong GBV i kamapim troma we i hait insait long ol meri i stap long dispela hevi, ol famili bilong ol na ol pikinini tu,” Mis Koisen i tok.

Em i tok strong olsem, “Ol NGO na sivil sosait i no inap paitim dispela kraim no gut ol yet. Em i taim bilong singautim olgeta stekolda long kisim na holim dispela isu bilong GBV, na bungim olgeta risos na save na wok bung long banisim na daunim GBV long PNG.”

“Mipela i bilip olsem sapos yumi strongim ol wok bung namel long ol gavman ejensi na NGO na sivil sosaiti bai yumi kamapim sampela gutpela mak bilong banisim na daunim GBV,” em i tok.

Mis Koisen em i namba wan Presiden bilong PNGWCCI na em bai i kirapim ol sapta bilong PNGWCCI long ol arapela hap long kantri.

Em i hop olsem sapos ol i kirapim dispela ol sapta bai ol i kamapim ol sans bilong givim trening long moa meri long lukautim mani bilong ol na stap strong wantaim dispela mani na ol i ken mekim ol gutpela disisen long laip bilong ol.

Harlyne Joku i raitim