BILIP inap helpim manmeri long winim ol salens long laip, wanpela Katolik pater i tok.

Pater Joseph Liaia bilong St Joseph Peris, Boroko long Pot Mosbi i tok maski kain kain traim i kamap, manmeri i ken daunim ol hevi.

Em i tok Blesed Peter ToRot i piksa bilong kain stap olsem.

Em i mekim dispela tok long taim peris i amamasim 25 yia anivesari selebresen bilong Blesed Peter ToRot long las Sande.

“Bilip i strongim tingting bilong yumi long daunim ol salens long laip na Blesed Peter ToRot i piksa bilong dispela stap,” Pater Joseph i tok.

“Taim yumi bilip long wanem samting i tru, yumi i no ken suruk na tingting planti.”

Pater Joseph i tok olsem Blesed Peter ToRot i piksa bilong gutpela na strongpela marit tu.

Em i tok maski Blesed Peter i save laip bilong em bai lus, dispela i no mekim marit bilong em i bruk. Nogat.

Em i tok Blesed Peter wantaim meri i sanap strong inap long em i dai.

 “Yumi ol marit i kisim strong long bilip bilong yumi long God na tras yumi gat namel long yumi yet,” Pater Joseph i tok.

“Dispela i ken helpim yumi long strongim ol arapela gutpela pasin long laip olsem rispek, kisim bel isi na trastim God.

Pater Joseph i bihainim rit long Gutnius bilong las Sande long fama i tromoi pikinini wit we sampela pikinini wit i pundaun long rot bilong wokabaut, sampela i pundaun long bus na sampela i pundaun long gutpela graun (Metyu 13: 24-30).

Em i tokim ol manmeri long ol i mas stap olsem gutpela graun we pikinini wit i pundaun, i gro na karim kaikai.

Ol manmeri i amamas long harim dispela tok.

Francisca Gawi husat i wanpela bilong ol manmeri i stap long selebresen i tok, “Mi amamas stret long dispela skul na selebresen bikos skul i strongim tingting bilong mi.

“Blesed Peter ToRot i bin sanap strong long bilip maski i gat bikpela traim. Em i piksa bilong gutpela graun.”

Em i tok Peter ToRot i bihainim tru Bikpela Jisas na bilip bilong em na olsem ol ona na preis i mas go long Papa, Son na Holi Spirit.

Pop na nau Santu John Paul II i bin kam long Pot Mosbi long 1995 na i bin mekim Peter ToRot i kamap Blesed.

ToRot i bin wok Katekis long Rakunai Peris, Gazelle long Is Nu Briten na i dai long han bilong ami bilong Japan long 1945 bikos long bilip bilong em.

Paul Harricknen i raitim