ST BARNABAS peris bilong Invanjelikal Luteran Sios (ELC) PNG long Lae Morobe provins i bin amamasim gut 134 yia anivesari bilong Gutnius i kam long kantri long las wik.

Peris i amamasim de wantaim ol pilai na lotu na i lukim 20 bebi i kisim Sakramen bilong baptismo, wanpela marit i kisim Sakramen na 155 bilip manmeri i kisim Holi Komunio.

Pasto Londi Siawong i bin go pas long dispela selebresen.

Em i tok sios bilong bipo i misin sios tasol tude em i sios bilong ivanjelaisesen. Dispela I min ol manmeri yet i kisim tok pinis na nau i mas sanap strong, kamapim ol wok na go aut na autim Tok bilong God.

Namba wan misinari bilong ELCPNG i go sua long Simbang, Finshafen, long 1886.

 “Lukluk bilong ELCPNG nau i olsem manmeri i kamap Kristen pinis we ol i mas sanap strong long bilip bilong ol,” Pasto Siawong i tok.

“Manmeri i kisim tok bilong God we ol i mas go aut na autim dispela tok.

“Tok bilong God tasol bai senisim man.”

Pasto Siawong i askim manmeri long sanap strong long bilip bilong ol long tok bilong God.

Em i salensim ol bilip manmeri olsem maski kain kain traim i wok long kamap wantaim kain kain sios i kamap long paulim bilip tru bilong ol, tingting bilong ol i no ken paul.

Em i askim ol manmeri long mekim ol famili bung, ritim baibel na pre olgeta de.

Em i tok pre na ritim tok bilong God i ken givim ol gutpela stia long laip bilong ol.

Em i tok peris i bikpela na i gat bikpela wok long mekim wok wantaim 11 kongrigsen stat long St Joseph Katolik Teknikal Koles na i go pinis long14-Mail na Wara Kalap.

Pasto Siawong i tok wantaim peris kaunsil i plen long holim wanpela bikpela tenkyu lotu long 30 Ogas long amamas long bilip i bin stap long peris na provins.

Siaman bilong peris, Peter Kunjil i tok tenkyu long Kristen i kamap na i tok tenkyu long Pasto Simon Ben na peris bilong en long Bumayong.

Pasto Ben i autim tok bilong God long lotu.

Em i tok long sanap strong long bilip ol i mas tingim foapela samting em namba wan samting em manmeri i mas kisim Bikpela long laip bilong ol, namba tu em pasin bilong laikim narapela brata susa, pre na namba tri em long ritim baibel na las em ol I mas putim God i go pas long laip bilong ol.

Paulus Tali i raitim