LONG Trinde apinun, 8 Julai 2020, wanpela yut bilong Benakofi komyuniti i kam long St Mary’s Peris long Goroka taun na i askim mi long yusim wanpela gita bilong sios long felosip lotu long komyuniti bilong ol.

Mi askim em, “Bai yupela wokim felosip long haus bilong husat?”

Em i tokim mi olsem, “Wanpela lapun klostu bai dai, olsem na em i askim mipela long wokim felosip long haus bilong em, long amamasim em na redim em i dai gut.”

Mi kirap nogut na tok, “O ya? Yupela i no toksave long mi olsem wanpela lapun i stap long komyuniti bilong yupela na bai mi kam na lukim em?

Bihain mi tokim em: “Sapos em i dai, no ken lus tingting long toksave long mi.”

Long Fonde, mi go lukim tupela lapun i stap long Genoka Setelmen. Nem bilong man em Josep na Sarah em i meri bilong em. Sarah i gat hevi long bodi bilong em long longpela taim. Em i slip tasol long bet. Josep, em i wanpela wokman bilong TALAIR bipo, nau em i lapun pinis na ritaia. Taim mi kam nupela yet long St. Mary’s, em i save go kam bihainim lotu Misa long Sande. Bihain mi no lukim em moa.

Long Disemba las yia, bubu bilong em i stap long Yunivesiti bilong Papua Niugini (UPNG) i kam holide na wanpela Sarere em i go long konpesio, na askim mi olsem, “Pater, inap yu kam lukim bubu bilong mi long Genoka.”

Tupela i stap long haus na i no save kisim Santu Komunio.

Taim mi go lukim tupela, mi painimaut olsem, dispela man tasol olgeta taim i kam long lotu, na nau em i no kam moa. Lek bilong em i no strong moa long kalapim maunten long St. Mary’s olsem na em i no kam long lotu long haus lotu  moa.

Las wik, Fonde, 9 Julai 2020, mi go lukim tupela gen. Long taim mi stap wantaim ol, ol i stori long mi olsem las nait, komyuniti memba bilong ol, Genoka na Benakofi i bung long haus bilong ol na wokim felosip.

Mi kirap nogut na mi askim. “Husat i laik dai nau? Bikos las nait, yut husat i kam kisim gita i tokim mi olsem, ol i wokim felosip long haus bilong wanpela lapun i dai.”

Tupela i lap amamas, taim mi askim husat i laik dai nau? Ol i stori long mi olsem, bipo long SoE, Komunio Minista i save bringim Santu Komunio long ol.

Tasol nau i no gat moa. Ol i tenkim mi planti taim bikos mi kam lukim ol long harim konpesio na givim Santu Komunio long ol.

Bihain long harim konpesio, prea na givim Komunio, tupela i tokim mi olsem, “Mitupela i tokim ol komyuniti memba i kam wokim felosip wantaim mipela, bikos longpela taim mitupela i no go lotu long haus lotu na mitupela i laik harim singsing na prea wantaim.

“Olsem na mipela i singautim ol i kam. I no bikos mitupela i laik dai. Dai bilong mitupela i stap long han bilong God. Mitupela i laik prea wantaim komyuniti na harim na joinim ol long singsing bilong felosip. Tenkyu tru Pater, bikos tude yu kam lukim mitupela na selebretim tupela sakramen wantaim mitupela. God em i gutpela olgeta taim”.

“Amamas bilong mitupela i stat las nait long felosip, na tude em i pulap moa yet, bikos Jisas i no lusim tingting long mitupela. Em i kam long Santu Komunio na stap wantaim mitupela long haus o hat bilong mitupela. Tenkyu tru Jisas.”

Fr. Paul Liwun SVD

_____________________________________

*: No ken lus tingting long lapun na sik manmeri long mekim pastorel wok bilong yumi. Ol i wetim Jisas olgeta de long go na lukim ol. Visit bilong yu i bringim Jisas long strongim na bringim spiritual wok stretim long ol.