MINISTA bilong Polis, Bryan Kramer i tok insait long mun Jun tasol olsem 647 keis bilong Jenda Bes Vailens (GBV) ol i putim ripot long Famili Seksuel Vailens Yunit insait long Nesenel Kepital Distrik.

Em i tok dispela em insait long Pot Mosbi tasol na ol i putim ripot long em, sapos bungim ol narapela provins o ol dispela keis ol i no save putim ripot long em, bai i gat planti tru.

“Dispela em i soim olsem GBV o famili seksuel vailens em i bikpela hevi long kantri we i soim olsem dai bilong Jenelyn em sistem bilong yumi em i bagarap,” Minista Kramer i tok.

Olsem Minista i lukautim polis taim em i lukim olsem planti pipel i bin sutim han long ol polis olsem ol i no bin mekim wok bilong ol long wanem Jenelyn i bin go bek long man bilong em na man bilong em Bhosip Kaiwi na em i bin dai.

Tasol Minista Kramer i tok, “Planti bilong ol polis meri i save wok em olsem meri tasol we olgeta de ol i save lukim ol meri i save go wantaim kain kain pasin nogut ol man i save wokim long ol. Planti bilong ol viktim ol i no save laikim polis long arestim ol man long wanem em man bilong ol. Sampela ol i save laikim tasol polis i no gat kar long go arestim man o hat long askim kot long aplai long IPO o ol i mas kisim pastaim medikol setifiket we ol i save sasim K100 tasol ol dispela meri i no gat mani.

Sampela taim dispela keis i save go long kot tasol kot i gat planti kot keis na ol i save go kam na sampela ol i no save wok na no gat mani bilong mekim bas fe na ol i save les nating. Sampela taim polis tu i no gat kar o bensin long go kalabusim man. Dispela em ol salens we lo i no save helpim ol meri wantaim GBV kes.”

Long dispela Polis Minista i tok Marape-Steven gavman bai i putim GBV namba wan long lukluk long keis bilong Jenelyn na ol narapela meri we jastis i ken kamap.

“Mi laik tok tenkyu long ol wokman na meri husat i bin traim long helpim ol viktim bilong GBV. Nau bai mipela i luksave long yupela na givim kar, bensin na ol narapela risos long mekim wok bilong yupela gut,” Minista Kramer i tok.

Charlpetson Koi i raitim