ASKIM nau i go long gavman long strongim Jenda Bes Vailens (GBV) lo long olgeta level bilong komyuniti.

Dokta Fiona Hukula, wanpela senia risetsa long Nesenel Risets Institut (NRI) long Pot Mosbi i tok gavman i no givim gutpela sapot na dispela i lukim ol hevi bilong GBV i wok long kamap bikpela yet.

Em i tok sapos gavman i gat strongpela tingting long daunim kain pasin olsem, em i mas strongim ol GBV lo long nesenel level i go daun long viles level.

Em i mekim dispela tok long taim nius long planti meri na pikinini i kisim bagarap long han bilong ol man na ol gavman i bin tokaut long dispela mun long givim strongpela mekimsave long ol lain husat i brukim GBV lo na ol lain husat i sutim tok long sanguma na bagarapim laip bilong ol arapela.

Minista bilong Atoni Jeneral na Jastis, Davis Steven i mekim sampela senis long Kriminal Kod long lukim olsem ol lain husat i brukim dispela ol i mas kisim bikpela mekimsave.

Tasol Dokta Hukula i tok maski gavman i tokaut long dispela ol senis, wok i mas stap long bringim dispela tok i go daun long viles level.

“I tru gavman i bel hevi long kain hevi i kamap na kamapim ol lo long daunim dispela ol hevi, tasol planti bilong dispela ol luksave i stap long Mosbi tasol,” em i tok.

“Bikpela namba bilong ol manmeri i stap long ol rurel ples, na dispela ol toktok i mas go long ol na olsem ol bai save na stap.”

Dokta Hukula i tok ol toktok bilong manmeri i no ken marit aninit long krismas bilong marit, long ol bikpela mekimsave long ol lain i brukim GBV na ol lain i bagarapim laip bilong ol arapela long tok bilong sanguma i stap ples klia long olgeta manmeri i mas save, stat long ol eben senta i go daun long ol rurel ples.