GUTPELA rilesen bai daunim planti komyunikebel (pasin bilong manmeri i pas wantaim) sik inap pinis taim manmeri i gat gutpela rilesen, wanpela pasto i tok.

Pasto Kasi Tau bilong PNG Kristen Lida Alaiens (PNGCLA) i mekim dispela tok long taim gavman na ol manmeri i wok long pret long sik coronavirus (COVID-19) na ol arapela sik long komyuniti.

Pasto Tau husat i Nesenel Kodineta bilong Kristen Sios grup we i wok wantaim Nesenel AIDS Seketeriet i tok planti ol sik olsem AIDS, TB, leprosi, misel, siplis na gonorea inap pinis taim manmeri i kamapim ol gutpela poroman pasin wantaim ol arapela.

Em i mekim dispela tok long wanpela kibung bilong HIV we i kamap long Mosbi i no longtaim i go pinis.

“Marasin bilong HIV/AIDS i no inap pinisim sik,” Pasto Tau i tok.

“Marasin i ken daunim strongim bilong binatang tasol i no inap long kilim.

“Manmeri i painim amamas na i ting marasin bai helpim ol bai no inap painim.”

Pasto i tok wanpela rot we inap long helpim ol manmeri long abrusim na daunim sik HIV/AIDS em long kamapim gutpela poroman pasin, marit na stap wantaim patna bilong yu olgeta taim.

Em i tok ol arapela sik tu i ken pinis taim manmeri i bihainim ol besik haijin skul olsem stap klin na lukautim bodi bilong yu.

“Olsem yumi olgeta i mas go bek long baibel na dispela tok bilong God inap helpim long senisim pasin bilong yumi na planti manmeri i no inap dai o lus nating,” Pasto Tau i tok.

“Sapos yu gat HIV/AIDS yu mas go long ol hetman bilong sios klostu long yu bai ol pre long yu olsem God long heven bai helpim yu.

“Sapos yu no kisim Jisas yet long laip bilong yu, yu mas tanim bel, askim God long pogivim yu na bihainim Jisas Krais na skul bilong em.”

Joe Dawai i raitim