RITAIA Pasto Reveren James Apollo, i lukluk bek long wok pasto bilong en wantaim bikpela senis insait long Luteran Sios.

Pasto Apollo em i bilong Nasuapum ples insait long Wampar LLG, Huon Distrik, Morobe Provins.

Bipo long James Apollo i bin greduet long Logaweng Senior Flierl Seminari, Finschhafen Distrik, Morobe, long 1985 long wok olsem pasto, sios i salim em i go wok pasto trening long Buang, Mumeng long Wau Bulolo distrik. Bihain long dispela em i kisim odinesen long 1986.

Bihain long dispela sios i bin salim em i go wok long ol seket olsem Mapos long wanpela yia, Kaiapit long 5-pela yia, Munum (4), Lowa Watut (5) na Zifasing (2). 

Sios i  salim em go wok long asples Nasuapum we em i stap 10-pela yia olgeta.

Long dispela taim em i bin statim wok bilong tanim Baibel i go long tokples Wampar aninit long wok bilong Summer Institute of Linguistic (SIL) long Aiyura, Ukarumpa, Isten Hailans Provins.

Dispela wok bilong tanim tok i no pinis yet, i wok long go het yet.

Reveren Appolo i tok, wanpela misineri bilong Korea aninit long SIL, i helpim ol long mekim dispela wok.

Tasol long nau, em i go lip (malolo) long Korea - na taim em i kam bek, ol bai kirapim gen wok bilong tanim Baibel.

Long ol yia taim em i wok pasto em i lukim pasin bilip i senis.

“Mi ting long taim bilong mi, mipela i wok pasto gut wantaim pawa na strong bilong God.,” Pasto Appolo i tok.

“Nau planti sios i kamap na paulim tok tru na wok bilong Gutnius."

Pasto Apollo i tok God i kisim yumi bek pinis taim yumi kisim baptais.

Na yumi kisim laip long pasin bilong bilip.

Na Nikodemu i askim em, “Olsem wanem na man i lapun pinis em inap long kamap nupela gen? Ating em inap long go insait long bel bilong mama bilong en na mama i karim em gen?”

“Na Jisas bekim tok olsem, ‘Tru tumas mi tokim yu, sapos man i no kamap nupela long wara na long Holi Spirit em i no inap i go insait long kingdom bilong God,” (Jon 3:4-5).

 Na Jisas i tok long man i mas karim diwai kros bilong en na bihainim em tu, (Matyu 10:38).

Pasto Apollo i gat 7-pela pikinini na las pikinini bilong en, Basil Apollo nau i mekim wok vika insait long Amele seket bilong ELCPNG Madang Distrik.

Sanang Zazoring i raitim