POP Francis i no amamas long Turkey i tanim 6 Sensuri haus lotu i go long lotu ples bilong Muslim relijen.

Em i tok em i sori stret olsem gavman bilong Turkey i mas mekim olsem long pasim wanpela hap we i makim histori bilong Kristen sios.

Em i tokaut long bel hevi bilong em long disisen bilong Turkey insait long lotu em i holim long St Peter’s Basilika, long Vatiken Siti long Rom, Itali long las Sande.

Ol nius ripot i tok Pop Francis i askim gavman bilong Turkey long givim luksave long Kristen relijen, moa long Katolik sios bipo long em i mekim kain disisen.

Hagia Sophia i nambawan bikpela sios long yia 537 taim ol i no wokim St Peter Basilika long Vatiken yet.

Dispela sios i kamap bihainim oda bilong Empera Justin husat i lusim Rom na go stap long Bijantain (Byzantine), nau kantri Turkey, na i mekim Konstatinopel (Constantinople) olsem kapitel siti bilong em.

Sampela yia bihain liklk, Roman Empera i go bek long Rom long Itali.

Dispela haus lotu i stap olsem inap long yia 1453 taim ol Muslim bilong Is long Syria na Arab i husat i yusim bainat na kilim ol Kristen manmeri na kisim.

Ol i kisim dispela haus lotu na lotu long em tasol sios i go bek long han bilong ol Kristen (Katolik) na bihain Grik Orthodox na i stap long han bilong Orthodox.

Ol Orthodox i lotu inap long 1934 we Turkey gavman i kisim na tanim sios i go long misium (museum).

Bikos long histori na biknem bilong haus lotu, planti ol turis i save mekim Hagia Sophia kedetrol olsem wanpela hap bilong go lukim.

Long las wik Fraide Presiden bilong Turkey, Recep Tayyip Erdogan i mekim disisen long tanim dispela haus i go long mosque, haus lotu bilong ol Muslim.

Dispela i mekim Pop Francis i no amamas.

“Mi tingim Hagia Sophia na mi sori stret,” Pop Francis i tok insait long las wik Sande lotu.

Planti ol arapela sios i no amamas long disisen bilong Turkey.

Wol Kaunsil ov Sios husat i kisim 350 Kristen lida i raitim wanpela pas i go long gavman bilong Turkey gavman long glasim gen disisen bilong em.