MANMERI long Westen Provins i holim yet bilip bilong ol, bisop bilong Daru Kiunga Daiosis, Giles Cote i tok.

Em it ok ol i soim dispela bilip long taim bilong coronavirus (COVID-19) Stet ov Imejensi (SOE).

Em i tok maski gavman i kamapim ol lo long wokabaut na bung bilong ol manmeri, ol i go het yet long holim ol lotu insait long famili.

Em i tokim Wantok Niuspepa long taim bilong bung bilong ol Katolik bisop bilong Papua Niugini na Solomon Ailan long stat bilong dispela mun.

“Moa manmeri i soim laik long bilip na COVID-19 SOE i testamen bilong dispela,” Bisop Cote it ok.

“Ol i laikim Jisas Krais na Jisas i kamap senta bilong ol long dispela taim.

“Wan wan famili i save holim prea na lotu long haus bilong ol na dispela i gutpela.”

Bisop Cote i tok.

Em i tok wanpela samting we i gutpela long PNG planti manmeri i no pas long ol kain kain senis we i kamap long wol.

Ol i stap long bus na ol senis long teknoloji i no paulim tumas tingting bilong ol.

Em it ok wan wan famili i ken stap gut na kamap strong taim ol i Beten Korona wantaim.

Em i tok taim famili i sindaun wantaim na i beten o pre korona, Mama Maria, husat i mama bilong Jisas na i mama bilong yumi tu i ken strongim ol.

Em i mekim dispela tok long taim ol Katolik manmeri i beten korona long dispela taim.

Katolik Sios, i makim Oktoba olsem mun bilong beten Korona.

Dispela i save lukim planti Katolik famili na ol bilip manmeri bilong ol arapela brata sios i save bung wantaim na mekim dispela beten.

Em i tok beten korona i ken helpim wan wan famili long bihainim stap bilong Holi Famili, we i gat Maria, Josep na Jisas. Gutpela famili i save kamapim gutpela sosaiti.

“Em i wokim meri long sait bilong man na i kisim meri i kam long em. …bihain long olgeta samting nau mi gat wanpela samting i wankain olsem mi, bun kamap long bun bilong mi, mi kamap long mi bilong mi. … Long dispela as man i lusim papa na mama bilong em, i bung wantaim meri bilong em na tupela i kamap, (Stat 2: 21-25.”

Em i tok planti famili i beten Korona long taim bilong COVID-19 SOE.

Paul Zuvani i raitim