MOA LONG 500 meri wantaim ol sampela man husat i sapotim bikpela awenes egensim jenda beis vailens (GBV) i bin bung aninit long Kalibobo Laithaus long Madang taun las wik Sarere long toktok strong long daunim dispela bikpela hevi insait long PNG.

Ol meri long Madang olsem presiden bilong Madang Provinsal Kaunsil ov Wimen, Mary Kamang na tu Madang taun meya, Ismael Yama i mas wantaim ol meri long toktok strong olsem dispela pasin bilong paitim meri i mas stop.

Moa long en tu Gavman i mas kamapim strongpela lo long stopim dispela ol pasin bilong GBV.

Dispela bikpela protes mas long Madang i wokabaut bihainim ol bikpela strit long Madang taun stat long Laiwaden oval na i go kamap long Kalibobo Laithaus we ol toktok i bin kamap.

Dispela protes mas na vijil o kibung egensim GBV i kamap bihain long ol bagarap na dai bilong wanpela yangpela mama long Mosbi, Jennelyn Kennedy, husat i gat 19 krismas.

Man bilong em i bin kilim em i dai sampela wik i go pinis.

Ol niuspepa i ripot i long pasin nogut man bilong em i kamapim taim em i kalabusim meri insait long haus na mekim kain kain pasin nogut.

Ol meri Madang i bin mas i go bung long Kalibobo na ol lida meri na Madang taun meya Ismael Yama i toktok long protes egensim GBV.

Mista Yama i askim tu Madang Provinsal Gavman long kamapim ‘Meri Seif Haus’ long helpim ol mama o meri we hevi bilong GBV em man bilong ol i paitim ol na ol i ranawe na i nidim helpim.

James G. Kila i raitim