SARERE 4 Julai, i makim 135 yia bilong Katolik Sios long hap bilong Papua. Bikpela selebresen i kamap long Bereina long makim dispela bikpela de bilong ol.

Dispela stori bilong ol Katolik misineri long Papua, i bihainim lekmak bilong Pater Henry Verius wantaim ol lain Misineri bilong Santu Hart (MSC) bilong kantri Frans. Ol i bin kamap long Yule Ailan, Sentral Provins we Pater Verius i bin wokim namba wan misa long 4 Julai 1885.

Long dispela taim, ol arapela sios i bin kamap pinis long Papua na putim mak bilong ol. Ol London Misineri Sosaiti (LMS) i bin stap long Delena na i save go kam long Yule Ailan. Ol i komplen long kolonial gavman bilong Papua na Gavana i rausim ol Katolik misineri long Yule Ailan. Fr Verius i kisim lain bilong em i go stap long Australia, tasol sampela mun bihain, gavman i tok orait na ol i kam bek gen long 9 Februeri 1886.

Long 4 Mas 1886, Fr Verius i statim namba wan katekismo skul long haus pater. Bihain long ol asples i bung wantaim na kamapim wanpela bikpela ples ol i kolim Tsiria, pater i go skulim ol manmeri long ples stret. Orait ol i kirapim wanpela skul na liklik haus lotu.

Long 15 Julai 1886, pater i baptaisim wanpela yangpela meri husat i sik na i laik dai. Tasol long 1887, bikpela hatwok bilong Fr Verius i karim kaikai we planti pipel i kisim sakramen bilong baptismo na kamap ol Katolik. Ol i kamapim tu St Peter Peris long ples Tsiria long dispela yia.

Sios long Yule Ailan i gro na moa misineri i kam na skruim wok bilong Katolik Sios i go long bikples Kairuku pastaim na bihain i go long ol arapela tokples grup long nambis na maunten bilong Sentral Provins.

Namba wan lokal pris bilong Papua, Louis Vangeke, em i kaikai bilong dispela sid ol MSC misineri i bin planim long Yule Ailan long 1885. Louis Vangeke i bin skul long St Patrick skul long Yule Ailan long 1918. Long 31 Janueri 1928, em i bin lusim Pot Mosbi long go skul long kamap pater long seminari long Madagascar ailan long Afrika. Em i kamap pris long 14 Jun 1937 na i kam bek long Papua we bisop i salim em i go wok long Fane, namel long ol lain Fuyughe pipel bilong Goilala distrik. Bihain em i kam daun long nambis gen na wok long ol arapela peris long Bereina.

Long 1973, Pop Paul 6 i bin go lukluk raun long Australia na Fr Louis Vangeke i go long Melbourne we Pop i mekim em i kamap namba wan bisop bilong PNG.

Tude, bihain long 135 yia, Katolik Sios long sauten rijon bilong Papua Niugini i gro bikpela moa na ol lokal pipel yet i go pas long wok. Na olgeta yia, ol pipel bilong Bereina, i save makim 4 Julai, olsem de Katolik Sios i kamap long hap bilong Papua.

Yu ken ritim moa stori bilong Katolik Sios long PNG long buk ol i kolim The Mustard Seed, em Georges Delbos i raitim long tokples bilong ol Frans na Fr Theo Aerts MSC, i tanim long Inglis.

Anna Solomon i raitim