OL Katolik bisop bilong Papua Niugini na Solomon Ailan i laikim gutpela wok bung wantaim gavman.

Nupela bisop bilong Rabaul Asdaiosis, Asbisop Rochus Tatamai i tok sampela taim nau em gavman i wok long kamapim ol lo wantaim no gat gutpela awenes wok na wok bung wantaim ol sekta.

Em i mekim dispela tok bihainim kamap bilong Nesenel Pandemik Ekt we palamen i bing kamapim long kibung bilong em long las mun.

Em i mekim dispela tok tu taim ol bisop i bung long 61 enuel jeneral kibung bilong ol long Pot Mosbi long las wik.

“Mipela i save ting gavman em bilong ol pipel, em ol pipel yet na ol pipel i kamapim gavman tasol inap long dispela taim, sampela wok i soim dispela tok i no tru,” Asbisop Tatamai i tok.

“Mipela i ting gavman bai go raun mekim awenes na kisim tingting bilong komyuniti pastaim bipo long em i kamapim Nesenel Pandemik Ekt tasol dispela i no kamap.

“Mipela i laik lukim moa awenes, trensperensi na akauntabiliti long ol disisen na ol lo i kamap long palamen.”

“Gavman i hariap tru long kamapim dispela lo. Em i no laik long mekim wok painim o givim sampela taim long luksave long wanem ol gutpela na ol salens bilong dispela lo.

Asbisop Tatamai i tok ol i no sapos palamen i bihainim ol lo i stap long Mama Lo long kamap bilong lo.

Em i tok ol i no gat mani bilong go long Kot tasol i gat grup ol i kolim Katolik Profesenel Sosaiti we ol i hop bai painim sampela rot long salensim kamap bilong dispela Ekt.

Paul Zuvani i raitim