ASBISOP Anton Bal bilong Madang Asdaiosis na Bisop Otto Separy bilong Bereina Daiosis i kamap presiden na vais presiden bilong Katolik Bisop Konprens (CBC) bilong Papua Niugini na Solomon Ailan.

Tupela bisop bai wok long dispela posisen long tripela yia.

Ol bisop i makim tupela bihain long 2020 CBC enuel jeneral kibung we i bin kamap long Pot Mosbi long las wik.

Tupela bai stap long lukim ol wok bilong het tok Katolik Leiti: Holi na Kamapim Wok Misin i kamap gut long ol dispela yia.

Dispela tok i tokim ol manmeri long kamap gut, kamap holi na redi long go aut na autim Tok bilong God.

Dispela singaut i go long olgeta Kristen manmeri long ol i mas wok bung long strongim dispela tok.

Ol CBC i amamasim tu 25 yia anivesari bilong Blesed Peter ToRot.

Peter ToRot i wanpela katekis husat i dai long han bilong ami bilong Japan long ples bilong em long Rakunai, Gazelle long Is Nu Briten long 1945.

Ami bilong Japan i bagarapim laip bilong em bikos long bilip bilong em na i givim em sut nogut na kilim em.

Ol bisop i askim ol bilip manmeri long bihainim lek mak bilong Blesed Peter ToRot husat i sanap strong long bilip na husat i soim tru bilip long gutpela Kristen famili.

Ol i askim ol papamama long skulim gut ol pikinini long tok na pasin bilip na long strongim famili yunit we i ken kamapim gutpela sosaiti.

Bihainim ol ripot, Pop John Paul II, nau St John Paul II i mekim Peter ToRot i kamap Blesed long Katolik Sios long 1995 long Pot Mosbi.

Planti arapela daiosis long PNG i amamasim 25 anivesari bilong Blesed Peter ToRot long Sande.

Kaikai bilong bilip bilong Blesed Peter ToRot em Asbisop Rochus Tatamai husat nau tumbuna man.

Pop Francis i makim Asbisop Tatamai olsem bisop bilong Rabaul Asdaiosis long tupela wik i go pinis.