LONG Sande 5 Julai 2020, mipela amamasim Pestode bilong Bleset Pita To Rot, namba wan martir bilong Papua Niugini.

Long St. Mary’s Peris Goroka mipela i gat tupela Misa bilong Pita To Rot.

Insait long skul bilong mi, mi bin mekim stori bilong wanpela dia (deer) meri i gat bel na em i laik karim pikinini.

Em i lusim ples na i go long painim wanpela gutpela ples, bai no gat wanpela samting kirapim em na bebi bilong em.

Em i wokabaut i go i go na namel long rot wantu tasol i gat bikpela ren i pundaun, klaut i pariap na laitning kamap na i kukim ol gras na diwai nabaut.

Em i pret stret, na em i laik tanim i go bek.

Tasol taim em i tanim i go bek, em i lukim wanpela man i painim abus i sanap wantaim spia na banara na redi long sutim em.

Na em i laik i go het. Tasol long fran bilong em, i gat wanpela bikpela Lion i sanap wantaim bikpela maus bilong em i op redi long kaikaim em. Em i no inap tanim na ran bikos i gat banis bilong bikpela ston (rock) na long lephan i gat wait ston i sanap i go daunbilo we bikpela wara i bihainim na kapsait i do daun.

Em i tingting long wanem samting em bai mekim? Givap na givim em yet i go long han bilong birua?

Long dispela taim em i lusim tingting long olgeta samting i laik bagarapim em.

Em i putim tingting na lukluk stret i go long karim pikinini bilong em na pikinini bai seif.

Bikpela ren na laitning i bikpela tru, i pretim dispela man i painim abus we i sutim spia bilong em i go long dia, tasol abrus na sutim lion long fran. Bikpela ren i pundaun yet na mekim man i pret na i ran i go long painim ples bilong hait.

Bikpela ren tu i kilim laitning i wok long pairap.

Lion i dai pinis long spia bilong dispela man. Dispela man i ranawe long ren painim ples bilong hait na dia tasol i stap na i karim pikinini bilong em we i seif.

_____

*Yumi bungim planti hevi na salens olgeta de long laip bilong yumi, sampela i bikpela na sampela i liklik.

*Olgeta hevi na wari em i kam na em i no stap, long wei yumi painim rot na stretim dispela ol hevi.

*Wanpela samting yumi lainim long dia insait long stoi, yumi i no ken kros o seksek. Go isi! Lukluk gut na tingting stret long wok yumi laik mekim. No ken tingting long hevi o wari, tingting long wok yumi laik mekim. Dia i no wari long lLion o man i painim abus, em i putim tingting bilong em (konsentreit) long plen bilong em long karim pikinini. Dispela tasol i mekim em i seif na karim pikinini bilong em!

Wantok Niuspepa 9 Julai 2020