MARIMARI bilong God i kam pinis, tasol ol manmeri i no opim tingting na hat bilong ol long luksave na kisim dispela marimari, Asisten het Bisop bilong Ivanjelikal Luteran Sios (ELC) PNG, Bisop Lukas Kedabing i tok.

Em i tok dispela i wanpela hatpela taim we kain kain pasin i kamap na paulim tingting bilong ol manmeri i go longwe long God.

Em i tok ol manmeri i stat long tingting long ol yet na ol samting bilong graun na putim God long baksait.

Em i mekim dispela tok long pinisim konprens em Nasuapum Kongrigesen long Wampar Seket, Jabem Distrik, long Nawaeb, Morobe Provins i bin holim long las wik.

“Maski insait long dispela ol senis yumi i mas sanap strong,” Bisop Kedabing i tok.

“Bai i gat ol giaman lotu i kam insait long bilip bilong ol.

“Yumi mas bihainim trupela pasin na sanap strong long bilip.”

Baibel stadi, toktok bilong senis i kamap bihainim het tok, “Kirap, kisim mat bilong yu na wokabaut," (Jon 5:2-9b; 14).

Bisop Kedabing i tok hia Jisas i tokim sikman long kirap na wokabaut.

Tok bilong man i kisim baptais, em i kisim marimari pinis, tasol nau ol i go na kisim babtais gen na lusim bilip bilong ol.

Wok sakramen tu i kamap na long Sande, ol i kisim Holi Komunio na pinisim bung.

Em i amamas tu olsem Nasuapum Kongrigesen inap sanap strong na kamapim planti wok em yet.

Las wik konprens long Banzi em 11 konprens we Nasuapum Kongrigesen i bin holim.

Konprens i gat Baibel stadi na Pasto Joshua Titus i bin go pas long em.

Nasuapum kongrigesen i wokim wanpela haus pasto pinis, na nau Pasto Joshua husat pastaim i bin stap long Aseki, Menyamya i go na stap long em. 

Sanang Zazoring i raitim