PAPUA Niugini komyuniti i luksave long pastaim Yunaitet Sios Modereta, Reveren Samson Lowa.

Reveren Lowa i dai long Ukarumpa, Kainantu long Isten Hailans long 24 Jun.

Ol i planim em long ples bilong em long Talesia, Wes Nu Briten long las Sarere.

Wantok Niuspepa i sori long harim dai bilong dispela man na i salim tok sori bilong em i go long famili bilong em.

Foapela bikpela sios, Angliken, Katolik, Luteran na Yunaitet Sios i papa bilong Wantok Niuspepa.

Long taim Reverend Samson Lowa i bin holim wok bilong Modereta, em i bin stap bod memba bilong Wantok Niuspepa long 2000 i kam inap 2013 we nupela Modereta Reveren Bernard Siai i kisim ples bilong em.

Taim Reveren Lowa i stap bod memba em i givim gutpela sevis long kampani long gutpela stia tok bilong em. Wantok Niuspepa i tok tenkyu long dispela.

Planti arapela manmeri i tok sori tu long harim dai bilong em.

Wanpela i rait long Facebook na i tok maski em i no wan lotu bilong Reveren Lowa tasol em i givim luksave olsem Reveren Lowa i wanpela bikpela man.

Em i tok maski Reveren Lowa i bin stap pasto, bisop na modereta bilong Sios, em i bin daunim em yet long laip na wok bilong em.

Narapela i rait tu long Facebook na i tok tenkyu long God long bringim kain man long komyuniti.

Em i tok God i kisim biknem long wok bilong kain manmeri olsem Reveren Lowa.