OL Nesenel Geming Kontrol Bod (NGB) na ol geming indastri I sanap strong wantaim ol arapela pipel bilong kantri long singaut na pinisim olgeta kain vailens I bagarapim sosaieti.

Ol Bod i bin joinim maus wantaim ol arapela ogenasesen, institute, sivil raits grup, sios na NGOs na gutpela sitisen bilong dispela kantri olsem jenda beis vailens na ol arapela kain vailens em mipela i mas no ken lukluk tasol long ai, na olgeta I mas sanap strong, tokaut, na kisim eksen wantaim long salensim na rausim olgeta kain vailens insait long kantri.

NGCB Sif Ekseketiv Opisa (CEO) Imelda Agon i bin soim sapot bilong em long taim ol i bin singaut na wokabaut i go wantaim long palamen long las wik wantaim ol wok man meri bilong em na ol arapela sekta long stopim vailens.

“Mipela olgeta i mas wok bung wantaim na stat eduketim ol yangpela jeneresen long rispektim ol meri bihain taim na taim ol gro go bikpela, ol bai i no save long dispela pasin bilong jenda inikwaliti o vailens.

“Olgeta papa mama bilong pikinini i mas no ken kamapim jenda beis vailens long haus long ai bilong pikinini, na lainim ol long gutpela samting olsem rispekt.

“Mipela i sanap strongim long rausim na salesnim vailens long kantri bilong mipela.” Agon i tok.

Agon i tok ol pipel i laik long stap insait long sosaieti we rispek i stap.

Ol NGCB i sanap strong nau long mekim moa awenes long stopim vailens bilong meri, pikinini na man, na ol bai yusim ol kopret sosol long mekim bai dispela toksave i ken go aut long husat lain i bungim vailens insait long famili, komyuniti na sosaiti.