Evangelical Lutheran Sios tok nogat tru long paitim ol meri na pikinini.

“Mipela i sanap wantaim ol gavman na sios long PNG na i tok nogat long dispela pasin bilong satan long paitim na kilim ol inosent pipel kain olsem ol meri na pikinini,” Reveren Dokta Jack Urame, Het Bisop bilong Evangelical Lutheran Sios bilong Papua Nuigini i tok.

Em i tok sios i no amamas tru long dai bilong wanpela yangpela meri i no long taim i go pinis. Olsem wanem man bilong en i givim skinpen long en na i kilim em isi isi i go inap meri i lusim laip. Em i no pasin bilong man.

“Dispela pasin we i kamap i soim olsem ol gutpela tingting i sting pinis. Mipela i no amamas long dispela pasin. Na bai mipela i no inap tru long larim dispela pasin i kamap kalsa bilong mipela, nogat!” Het Bisop Urame i tok.

Em i tok, ripot bilong wanpela meri we i dai i no long taim i go pinis, em i wanpela bilong ol planti keis we i hait i stap. Planti ol meri i wok long kisim taim tasol ol i no kam aut na tok aut long pablik bikos ol i sem na pret long sampela samting.

Ol dispela kain ol pasin bilong vailens i no save kamap long bipo taim, Het Bisop Urame i tok, tasol nau em i kamap laipstail bilong sosaiti long tude na em i wok long i go bikpela.

“Laip bilong man em presen i kam long God, olsem na yumi mas rispektim laip bilong ol man olgeta taim.  Na tu yumi gat wokmak long lukautim laip bilong wanpela na narapela.

“Sapos ol pipel i no inap long rispektim laip bilong man, wanem moa gutpela samting i stap long sosaiti bilong yumi tude?

“Ol dispela vailens na dai i kamap long kantri i soim olsem ol gutpela pasin we i save bungim mipela olgeta olsem wanpela famili na komyuniti i wok long pinis.  Ol gutpela pasin olsem laikim, lukautim na rispekim wanpela na narapela i lus pinis long sosaiti bilong mipela.” Reveren Urame i tok.

Em i tok ol meri em ol i gat laip, nem na namba. Ol i no samting nating. Ol i mas no ken stap long pret insait long haus bilong ol. Wankain long ol pikinini tu.

Rebecca Negere i raitim