GOD i save bihainim tok bilong en, na em i bai i no inap larim wanpela bilong ol traim i kamap long yupela we bai winim yupela.

Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem: Em bai i mekim yupela i sanap strong na dispela taim bai i no inap daunim yupela (1 Korin 10:13).

Wanpela taim papa wantaim pikinini man bilong en i go long stua.

Papa i holim mani na pikinini man i karim bilum.

Long stua papa i baim sampela kaikai na putim i go insait long bilum bai pikinini i ken kisim dispela ol samting.

Papa i putim ol samting i go insait inap bilum i pulap olgeta.

Tupela i lusim stua i go na long rot tupela i bungim wanpela meri.

Meri i lukim pikinini man i karim bilum i hevi tru na i tingting planti na i sori long em.

Meri i lukim na skelim olsem papa i no tingting gut long strong bilong pikinini na larim em i karim bilum.

Meri i go klostu long pikinini na askim em olsem: “Ating dispela bilum yu karim em i hevi tumas long yu a?”

Pikinini man i lukluk long meri na i smail na em i tok, “Dispela bilum i no hevi tumas. Nogat. Papa bilong mi i save gut hamas mi inap long karim.”

Buk Song 103:13-14 i tok: “Papa i save sori long pikinini bilong em. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yum ii olsem das tasol.”

Yes, Papa God i bin wokim yumi na em i save gut long hamas hevi yumi wan wan inap karim. Papa God i save skelim gut. Em i no mekim rong. Em i save sori long pkinini bilong em.

Olsem na yumi i ken stap bel isi na karim ol dispela hevi God i givim yumi.

Long olgeta taim tu yumi i ken save wanem samting Papa God i laik putim long “bilum” bilong yumi, em i save skelim gut pastaim.

Papa i save gut tru long hamas hevi yumi bai karim. Olsem na yumi no pas pret na tingting planti.

Long olgeta wan wan de yumi putim yumi yet i go long strongpela han bilong God.

Em i save pastim long hevi yumi bai inap karim taim em i putim “bium” long yumi.