Long Evanjelikal Luteran Sios (ELC) i sanap strong insait long senis bilong tude, sios i mas holim ol veliu na strong bilong en insait long wok bilong en. 

Asisten bishop bilong ELC PNG, Reveren Lukas Kedabing, i mekim dispela tok long ai bilong Nasuapum Luteran Kongrigesen konprens long Banzi insait long Wampar LLG, Huon Distrik, Morobe Provins long las wik. 

Bishop Kedabing i tok, wanem samting i mekim veliu na strong bilong sios em pasin bilong rispek, bihainim tok bilong God na ol gutpela pasin insait long kalsa.

Planti pipel i no sanap strong na bihainim tok bilong God na bilip ol i gat long baptais ol kisim.

Sapos ol i no holim strong Tok bilong God dispela bai givim laip long ol.

Bisop Kedabing i tok ol senis teknoloji na sosaiti i mekim ol manmeri i givim baksait long bilip na Tok bilong God.

Em i salensim ol sios memba long no ken bihainim laip na pasin bilong graun tasol i mas sanap na strongim ol skul Jisas i givim na tok  i stap long Baibel.

Em i tok em i wok bilong kongrigesen long sapotim ol manmeri bilong sios.

“Ol pasto na ol arapela sios lida i save autim tok bilong God, olsem na em i wok bilong kongrisen long sapotim pasto,” Bisop Kedabing i tok.

“Long dispela rot, kongrigesen bai lukim veliu bilong wok pasto i mekim.

“Taim pasto i autim tok bilong God na strongim ol manmeri long sait bilong spirit, kongrigesen bai sapotim pasto wantaim ol samting olsem kaikai na wara.”

Bisop Kedabing i salensim ol kongrigesen memba long kamapim ol nupela haus lotu tu.

yumi.

Em i tok planti ol ELC haus lotu i lapun na bagarap na olsem ol memba i mas helpim na kamapim ol nupela haus lotu.

“Sapos ol i bilip long Tok bilong God, orait ol i sanap wantaim veliu bilong bilip na kamapim kaikai bilong wok.

“Ol pikinini bilong dispela taim i no ken lukim olsem sios i samting bilong bipo o samting bilong ol lapun tasol.

“Nogat. Ol i mas pilim ol i hap bilong sios na karim wok insait long wok bilong sios tu.

“Yumi olgeta i hap bilong sios we i bodi bilong Krais na Krais i stap insait long God.”

Dispela konprens i stat long 25 Jun na i pinis long 28 Jun, 2020.

Sanang Zazoring i raitim