OL bisop bilong Katolik sios i askim long strongim Kristen na sosel velu insait long famili, Bisop Rochus Tatamai, Presiden bilong Katolik Bisop Konprens (CBC) bilong Papua Niugini na Solomon Ailan, i tok.

Em i tok i no gat as long manmeri i mas go het long bungim ol hevi taim i gat inap save na risos i stap pinis long sapotim gutpela sindaun bilong ol.

Em i mekim dispela tok long taim ol bisop bilong PNG na Solomon Ailan i holim enuel jeneral kibung (AGM) bilong ol long CBC opis long Pot Mosbi long dispela wik.
Kibung i stat long Mande na bai pinis long tude.

Long tude tu ol bisop bai tokaut long bikpela pastoral toktok bilong ol bihain long dispela kibung.

Het tok bilong 2020 AGM em long Katolik Leiti: Holi na Kamap bilong Wok Misin.

Tripela CBC Komisin; Integral Humen Divelopmen, Kristen Fomesen na Misin bai go pas long dispela ol toktok na bai kisim tripela yia long mekim dispela awenes.

Taim manmeri i kisim baptais, ol i kisim tu singaut bilong wok misin, long go na autim tok bilong God.

Em i tok Jisas Krais bipo long em i go long heven i givim wok long yumi olgeta manmeri long go aut “baptaisim ol manmeri long Papa, Pikinini na Holi,” (Metyu 28:19; Aposel 1: 8)

Na olsem yumi kisim dispela strong pinis na yumi mas skruim dispela tok.

Em i tok dispela i no wok bilong pris, bruda na sista tasol long ol i autim tok bilong God.

“Sios bai go het yet long toktok long wok bilong strongim bilip, Kristen na moral velu insait long ol famili na long humen integral divelopmen long kantri,” Bisop Rochus i tok.

“Sios i makim maus bilong ol liklik manmeri long toktok long ol hevi bilong sosel sevis olsem helt na edukesen; gutpela gavanens, transperensi na akauntabiliti na ikual skelim bilong mani na ol benefit bilong neturel risos.

“Sios bai sekim na strongim wok poroman namel long ol sios na gavman.”

Bisop Rochus i tok ol bisop bai toktok tu long kam bilong Pop Francis long PNG na Solomon Ailan long 2021 tasol i no inap toktok planti long dispela bikos long hevi bilong coronavirus (COVID-19).

Paul Zuvani i raitim