WOK long Rabaul Asdaiosis i hap wok bilong singaut bilong wok bilong God na i nogat tupela said bilong en, Bisop Rochus Tatamai i tok.

Em it ok wanem hap sios i makim wokmanmeri bilong en long go wok, dispela hap bilong singaut long laip bilong ol na olsem askim bilong sios long em long go wok long Rabaul Asdaiosis i nogat asua long em.

Bisop Tatamai i tokim Wantok Niuspepa bihain long taim Pop Francis i bin makim em long kamap asbisop bilong Rabaul Asdaiosis long las wik.

Em i tok i gat tupela sait long em i go long asples bilong em.

Tatamai i bilong Rakunai long Gazelle, Is Nu Briten.

Long gutpela sait em long ol pipel; ol leiti, pater, bruda na sista i save long em na em i save long ol.

“Gutpela em olsem mi save long ol dineri long Rabaul, Kokopo na Pomio na ol salens ol i gat long ol pastoral wok, long helt na edukesen sevis na ol arapela wok,” Bisop Rochus i tok.

“Tasol bikpela salens em long rot bai mipela i bungim dispela save yumi gat na kamapim ol wok we i ken helpim ol pipel.”

Bisop Tatamai i tok sapos em i go long asples bilong em yet o long narapela, em i no samting bilong wanpela i painim amamas. No gat.

“Dispela em long kam save long laik bilong God long ol pipel bilong em wantaim lidasip ol i mas gat long strongim bilip bilong ol na rot bilong kisim salvesen.

“Mi bai go het yet long ol pastoral program bilong mi na wok wantaim plen ol i gat pinis, maski wanem hap ol i kam long em.

“Mi mas gat dispela lidasip we i sevim olgeta manmeri na dispela i bihainim laik bilong God.”

Bisop Tatamai i stap sotpela taim wanpela yia long, Nu Ailan na Manus, em i laikim ol pipel na ples long Kavieng Daiosis.

Em i tok daiosis i gutpela wantaim naispela ol samting, kalsa na ol manmeri i amamas.

 “Mi inap long wok wantaim ol pater na leiti na kamapim ol wok we daiosis wantaim ol peris i ken kamapim ol wok long strongim ol yet.”

Bisop Tatamai i wok tu long strongim Katolik Ejensi Skul sistem long provins.

Em i hop olsem dispela gutpela straksa i stap bai i  ken sapotim Daiosis long go moa.

Paul Zuvani i raitim