BISNISMAN Simon Kaiwi, papa bilong kik boksa sempion bilong Pasifik Donald Kaiwi na bubu bilong Bhosip Kaiwi, man husat i kilim Jenelyn Kennedy, i tok sore long kantri na olgeta meri insait long kantri olsem bubu bilong en Bhosip wantaim kolpela blut bilong en na pasin bilong pikdok i kilim i dai naispela yangpela meri.

“Mipela i laik bung wantaim ol manmeri long kantri na tok nogat long dispela birua na eksen long kamap long laip bilong ol mama, pikinini meri, ol sista na ol anti insait long kantri. Domestik Vailens em i kraim,” Kaiwi i tok.

Em i tok em i hat tru long toktok long eksen bilong Bhosip antap long yangpela mama. Ol bikpela skinpen we em i givim Jenelyn em hat tru long toktok.

“Mi bin stap olsem man bilong lukautim lo long 20 krismas. Mi save pait long daunim pasin nogut na vailens long ol meri na pikinini na mi no save ting olsem wanpela famili memba bilong mi yet bai mekim kain nogut pasin na vailens long narapela famili memba bilong mi yet, nogat.

“Nogat wanpela toktok i ken tokaut gut long bel hat no pen we tupela sait bilong famili wantaim i pilim long Bhosip.

“Mipela i nogat tok long mekim, na sapo mipela i toktok tu dispela i bai no inap mekim wanpela samting, olsem na long bel bilong mipela ol Kaiwai famili mipela i laik tok bikpela sore tru long dispela hevi i kamap,” Mista Kaiwi i tok.

Em i tok, Bhosip em pikinini man na wanem disisen na laip em i stap long en em i mekim long laik bilong en we em i ting i orait long en.

“Mipela i laik tok stret olsem ol giaman toktok i go aut olsem mipela i sapotim em long laip bilong en em i giaman toktok. Mipela i sem na les tru long pasin em i mekim na bagarapim nem bilong famili bilong mipela na bilong Jenelyn tu,” Kaiwi i tok.

Em i tok, ol Kaiwi famili na traib bilong ol long ples i sanap wantaim ol famili bilong Jenelyn na i tok nogat long eksen bilong Bhosip na ol i laik lukim olsem jastis i mas kamap na lo i mas mekim save long en.

Bubu man bilong Bhosip, Simon Kaiwi i tok ol i bai givim gut rispek long bodi bilong Jenelyn inap ol i planim em.

Rebecca Negere i raitim