Bipo bipo tru, wanpela meri save stap long namel bilong bikpela bus. Dispela meri ya i gat wanpela bebi nau tasol em i karim long en.

Long wanpela taim, em wantaim bebi bilong en i stap long haus na no gat kaikai na tupela i hangre. Meri ya i wasim bebi bilong en na slipim em insait long bilum.  Em i karim bebi ya long bilum na tupela i go painim kaikai bilong tupela long bus.

Orait long dispela taim tu, wanpela narapela meri em i stap long ples na em tu i laik painim kaikai bilong en olsem na em i go long big bus. Em i kam kamap long dispela hap we planti kaikai i pulap long en na em i kisim ol kaikai stap.

Tupela mama na bebi i go kamap long wanpela hap long bus we planti kaikai olsem mau banana na ol frut bilong diwai i pulap long en na. Mama ya i tingting long bungim kaikai bilong olsem na em i painim han bilong diwai long hangamapim bilum wantaim bebi.

Orait, dispela narapela meri i wok long painim yet kaikai bilong en na em i harim bikpela nois i kamap long sait bilong bus. Em i putim ia na ai bilong en i stap na em i lukim wanpela meri wantaim bebi bilong en i wok long kam olsem long hap em i stap long en.

Taim narapela meri ya i lukim olsem, em i paul nau long wanem hap em bai i go hait long tupela. Em i wok long tingting yet i stap na tupela i kam klostu pinis long en. Hariap tasol em i kisim ol lip bilong diwai na haitim pes bilong en.

Orait, dispela meri wantaim bebi ya i lukim naispela hap bilong hangamapim bilum bilong bebi na em i go hangamapim na go painim kaikai bilong tupela. Em i wok long painim yet kaikai na isi isi em i wok long go longwei long bebi bilong en.

 Mama bilong bebi ya i no luksave olsem em i hangamapim bilum bilong bebi long solda bilong narapela meri ya.  Dispela meri ya i lukim olsem meri ya i go longwei long bebi bilong en, em isi tasol karim bebi ya na ran i go bek long ples bilong en.

Orait, mama bilong bebi ya i painim kaikai pinis na em i laik go bek long haus na em i tingim hap we em i lusim bebi bilong en. Em i kamap long hap ya tasol em i no lukim dispela diwai. Em i painim bebi bilong en long olgeta hap long bik bus.

Em i no lukim bebi bilong en na i wari na krai. Em i singaut nau long bebi bilong en olsem bebi yu stap we ''kum pra pra pra".

Orait long ples, meri ya i stilim bebi ya i go long haus bilong en na mekim bikpela paia na boilim pot wara pinis em i kilim bebi ya na kukim na kaikai. Bel bilong en i pulap na em i amamas na slip gut long bet bilong en.

Long taim mama bilong bebi ya i wok long singaut long bebi bilong en, bebi ya i harim nek bilong mama bilong en na i bekim na tok mi stap long hia insait long bel bilong dispela meri ya long ples.

Meri ya i harim olsem bebi insait long bel bilong en i bekim singaut bilong mama bilong en,na tingting bilong en i kam olsem em i kaikai pinis bebi bilong masalai meri.

Masalai meri ya i harim nek bilong bebi bilong en na bihainim. Singaut bilong masalai meri ya i wok long kam klostu na krai bikpela na bebi tu wok long bekim mama bilong en na tokim mama bilong en olsem mi stap long hia.

Meri ya long ples i stat long painim ples bilong hait nau. Taim em i harim olsem masalai meri ya i kamap long ples, em i apim ol han bilong diwai em i putim insait long haus bilong mekim paia na slip ananit na karamapim em wantaim ol han diwai.

Masalai meri ya i singaut ken long bebi bilong en "kum pra pra pra", na bebi ya i bekim. Masalai meri ya i go long haus bilong dispela meri ya na pulim em kam ausait long hap em i hait i stap na kamautim bebi bilong en insait long bel bilong meri ya na kisim em i go.

Christophilder Korenu i raitim dispela stori na em i kam long Kainantu Distrik long EHP.