WANPELA senia pasto i singaut long ol pipel bilong Batri komyuniti bilong Sauten Hailans husat i stap long ol arapela hap bilong kantri long go bek na strongim komyuniti.

Pasto Andrew Kewa bilong Evanjelikal Sios bilong Papua Niugini (ECPNG) i tok lokal manmeri bilong Batri i mas go bek long ples na kamapim ol wok long strongim komyuniti.

Em i tok sindaun bilong ol manmeri i bagarap bikos i gat planti kros pait na birua i stap namel long ol pipel.

Em i tok dispela hevi kamap tu bikos i no gat gutpela divelopmen i kamap.

Em i tok long helpim ol manmeri ECPNG bai holim foapela de Krismas krused bihain long yia long Mugolo main sait long Kagua long 24 i go long 27 Desemba, 2020.

Dispela long kamapim bel isi na sekan namel long Kanarepa na Perepe traib na tu ol narapela 10-pela traib insait long Batri komyuniti.

“Long dispela 13 prea bung ol manmeri bai pre long God na tok sori long asua bilong ol,” Pasto Kewa i tok.

“2008 kam inap 2020, ol manmeri i mekim kain kain pasin na sindaun i no bin gutpela.

“I nogat gutpela gavman sevis olsem helt, edukesen, ples balus, rot na ol arapela bikpela sevis i go long komyuniti.

“Pipel i stap olsem laip bilong bipo, mipela i stap long tudak.

Pasto Kewa i tok hevi bilong ol Batri i stap long han bilong ol yet na ol yet bai stretim dispela wantaim helpim bilong God.

Em i tok kros pait na birua komyuniti i stap inap 13 yia olgeta na ol papamama, bratasusa i stap longwe long ol yet.

Pasto Kewa i skelim tu kain sindaun olsem ol pikinini bilong Juda long Baibel husat i kisim mekim save bikos ol i givim baksait long God na narapela kantri i kisim ol i go kalabus long Babilon inap long 70 yia.

Tasol taim ol Judaman i luksave na tok sori, God i mekim ol i go bek na stretim gen banis bilong Jerusalem.

Pasto Kewa i singaut long lokal Memba Wesley Raminai, Sauten Hailans Gavana William Powi na ol narapela saveman bilong Kagua-Erave distrik long kamap na givim sapot long ol sios olsem ECPNG, Nasarin, Katolik, Kristen Laip Senta naYunaitet Pentekostol Sios long strongim bel isi na gutpela sindaun long ples.

Willie Brul i raitim