TOKTOK bilong Sr Emma Lapun long Catholic Bishops Conference of PNGSI (CBC PNGSI) i no bikpela tasol em i gat kik.

Sr Emma i toktok long ol wanwok bilong em long CBC long makim Wol Envaironmen De.

Em i tok long helpim long daunim hevi bilong klaimet senis yumi mas mekim ol liklik samting olsem no ken tromoi pipia nabaut na putim lait of na pasim wara tep.

Sr Emma na ol arapela wanwok bilong em i bin bung na serim ol bikpela tingting i stap insait long Ensiklikel o pas bilong Pope Francis i go long sios em i kolim long Laudato Si: ‘Lukautim dispela wanpela ples bilong yumi olgeta’.

Dispela namba tu pas bilong Pope Francis em i toktok long lukautim ples graun.

Laudato Si i gat 6-pela sapta. Sapta wan i toktok long (Common Home) wanpela ples we yumi olgeta i serim. Sapta 2 i toktok long (Gospel of Creation) Gospel bilong kamapim olgeta samting. Sapta 3 i toktok long (Human Roots of Ecological Crisis) yumi pipel olsem as tru bilong ol hevi i wok long kamap long bus, graun, wara na sindaun bilong ol pipel. Sapta 4 i toktok long (Integral Ecology) yumi olgeta I konek long wanpela na narapela na sapta 6 (Lines of Approach and Action) i soim sampela bilong eksen.

St Ancy husat i bin serim sampela tingting I stap insait long sapta em i ritim i tok,em i taim sios i mas holim sampela strongpela toktok long sait bilong politik na ikonomi.

Patrick Harricknen bilong Catholic Professional Society long Mosbi i bin stap long dispela bung tu. Em i tok em i gutpela long kisim olgeta infomesen long Laudato Si na lainim gut na go aut na mekim eksen.

CBC i statim pinis sampela program long lukautim mama graun. Wanpela program em ‘Keep it clean, Go Green’ na narapela em program bilong planim diwai long Bereina Distrik long Sentral Provins.