Wanpela yangpela man i bin greduet long yunivesti na i painim wok.

Planti kampani em i bin aplai, tasol i nogat wanpela i kisim em yet. Wanpela de, bikpela kampani i singautim em long intaviu.

Dairekta bilong kampani yet intavium em. Dairekta i askim planti samting, em i bekim gut na i mekim dairekta i amamas. Bihain dairekta i askim gen: “Yu bin kisim skolasip taim yu stap long haiskul na yunivesiti o nogat?” Yangpela man i bekim “Mi no bin kisim wanpela skolasip”. Narapela askim gen:”Papa bilong yu tasol i baim olgeta skul fi bilong yu a?” Yangpela man i tok: “Nogat! Papa bilong mi i dai, taim mi liklik mangi yet. Mama bilong mi yet i bin baim olgeta skul fi bilong mi.” “Mama bilong yu i wok long we?” Dairekta i askim em. Na yangpela man i bekim, “Moa long 15 yia nau mama bilong mi i mekim wok bilong wasim klos bilong ol narapela, na ol i baim em.”

Nau Dairekta i askim yangpela man long soim han bilong em. Han bilong yangpela i stret na i gutpela, olsem na Dairekta i askim em gen: “Yu bin helpim mama bilong yu long wasim klos o nogat?”

“Nogat!” Yangpela man i bekim. “Bikos mama i laik bai mi stadi na tingting tasol long skul bilong mi. Em i save wasim klos hariap tru, i winim mi!”

Long harim dispela, Dairekta i sekim het bilong en tasol na putim wanpela kain lukluk na askim yangpela man gen: “Nau yu go na baim wanpela hanbodi krim na long nait bai yu putim na mas rabim han bilong yu wantaim dispela krim bilong bodi. Tumoro yu mas kam bungim mi gen na mi wokim disisen, bai yu wok o nogat.”

Yangpela man i kirap nogut long dispela askim. Tasol em i go baim handbodi krim na go long haus. Em i stori long mama bilong en olsem wanem intaviu bilong en. Taim mama i harim stori bilong pikinini, em tu i kirap nogut long dispela askim bilong dairekta. Tasol em i amamas taim em i lukim gutpela spirit na gutpela smail i stap long pes bilong pikinini bilong en. Em i larim pikinini bilong en i rabim hanbodi krim long han bilong en.

Yangpela man i bihainim tok bilong dairekta na i askim em long mekim. Isi em i rabim han bilong mama wantaim krim. Nau aiwara bilong en i kapsait. Bikos em i painimaut olsem han bilong mama i no stret na i pulap wantaim planti mak bilong kain kain sua. Dispela em bikos long sop, wara na klos. Long dispela taim, yangpela man i stat long luksave olsem em i bikpela sakrifais tru bilong mama bilong en olgeta de long painim mani long baim skul fi bilong en.

Neks de em i go lukim dairekta wantaim solap i stap long han bilong en. Dairekta i askim em: “Inap yu stori long mi wanem samting yu wokim asde?”

“Mi bin rabim krim long han bilong mama. Na bihain mi kisim ples bilong en long wasim klos, Sir!

“Ok, inap mi save, wanem samting yu pilim nau? Yangpela man i pulim longpela win na i tok: “Namba wan: Mi save, sapos mama bilong mi i no sakrifais long mekim wok, bai mi i no stap long hia tude. Namba tu: Nau mi luksave olsem wok bilong painim mani i no wanpela isi wok. Namba tri: Nau mi luksave olsem famili em i bikpela samting, mi mas rispektim famili bilong mi.”

Dairekta i mekim wanpela askim gen: “Nau, mi laik save, wanem samting bai yu wokim sapos mi kisim yu wok long hia?” “Mi bai askim mama bilong mi long ritaia,” yangpela man i bekim.

Bihain long em i harim bekim bilong yangpela man; Dairekta i tok: “Dispela pasin tasol mi laik bai olgeta menesa i mas wokim. Mi laik rikrutim man husat i soim rispek long hat wok bilong narapela manmeri. Bikos dispela em i wanpela bikpela samting tru insait long laip bilong yumi. Mak bilong skul bilong yu i gutpela tru. Olsem na nau mi kisim yu long wok wantaim kampani bilong mi.

________

*Respektim hat wok na sakrifais bilong narapela manmeri husat i sapotim yumi long kamap gutpela long stadi na wok bilong yumi. Bikos sapos no gat helpim bilong narapela, yumi bai no inap long kisim samting nating.

Wantok Niuspepa 11 June 2020

Fr. Paul Liwun SVD