OL Kristen manmeri long Evanjelikal Luteran Sios long Kote Distrik, Finshafen i kisim gutpela sapot long Gavana bilong Morobe Ginson Saonu.

Saunu i givim moto bot wantaim moto long helpim sios long wok bilong en.

Gavana Saonu i tok wantaim moto bot, sios i ken go aut na autim tok bilong God na helpim ol manmeri tu long ol arapela wok olsem helt na edukesen.

Em i tok planti taim ol pasto i save painim hat long kalap long moto bot bilong ol arapela lain taim ol i laik go long Lae.

Em i tok em i gat bikpela luksave long ol pipel bilong Kote na Yabim bikos long ol bilip long Luteran i go aut long ol arapela hap bilong kantri.

Em i tok Pangu Pati aninit long Morobe Provinsal Gavman i luksave na i laik strongim 6-pela samting.

• Namba samting God i go pas long wok bilong ol olsem God Anutu;
• Provinsal Gavman i mas sapotim wok bilong sios;
• Gavman i mas strongim wok bilong helt na edukesen na bisnis;
• Gavman i mas strongim wok bilong egrikalsa;
• Gavman i mas strongim sosel ektiviti olsem spot; na
• Gavman i mas strongim wok bilong lo na oda na i mas gat bel isi long komyuniti.

Saonu i tok long olgeta as bilong wok bilong ol God Anutu bai go pas long ol.

Em i tok tu long strongim “Early Childhood Education Program” o Skul bilong ol liklik pikinini olsem tok bilong lotu tu i mas stap insait.

Em i tok tu long kamapim tisa trening koles long Heldsback long Finshafen long strongim ol pipel bilong Kote na Yabim.

Em i laik kamapim wanpela turis trek long Miti i go long Yabim na Kote bihainim lek mak bilong ol namba wan misineri i bin wokabaut long dispela hap.

Reveren Metu i tok longpela taim ol i no bin kisim kain luksave na helpim na sapot bilong Saonu i kamap long taim we ol i laikim tru helpim.

Em i amamas na i tok tenkyu long Saonu na i tok sios bai wok bung wantaim gavman bilong en long kamapim ol wok.

Paul Tali i raitim