OL memba bilong Evanjelikal Luteran Sios (ELC) long Lae, Morobe Provins i bin opim haus sel bilong ol long lotu long 24 Me, 2020.

Kamap na dedikesen bilong haus sel i kamap bihain long hevi bilong wara Busu i tait na rausim haus lotu bilong ol long Epril, 2020.

Asisten bisop bilong ELCPNG, Reveren Lukas Kedabing i kisim singaut long blesim haus sel bilong lotu.

Busu kongrigesen i kisim tupela wik long sanapim dispela haus sel.

Ol i kamapim dispela haus sel bilong strongim bilip na spirit long taim ol i wet long bungim ol samting long kamapim nupela haus lotu.

Long wankain taim ol i putim diwai kros i go antap na blesim olgeta hap bilong haus sel long ol i ken stat yusim.

Ol pipel bilong Yaros long Markham wantaim ol Kabwum i go pas long prosesio long taim bilong lotu na blesim haus sel.

ELCPNG Jeneral Seketeri Bernard Kaisom i katim ribon na ol i opim haus sel.

Senia Pasto na pastaim ELCPNG Evangelism Seketeri, Reveren Binora Yunamu i opim dua bilong haus sel.

Em i tokim ol manmeri olsem maski sapos ol i lotu insait long bilding o long haus sel, bikpela samting em bilip bilong ol. Ol i mas sanap strong long bilip bilong ol.

Em i amamas olsem ol pipel i holim yet bilip bilong ol yet na kamap long dispela de bilong opim haus sel. Kamap bilong haus sel i mak bilong bilip bilong ol.

Em i tok God i bin go pas long ol manmeri taim ol i karim 10 Komanmen long haus sel na raun long ples wesan o ples no gat manmeri i save go taim ol i wet long go long Kena.

Long wankain wei, ol tu bai mekim olsem inap long taim ol i kamapim nupela haus lotu na lotu insait long em.

Komyuniti i statim pinis ol wok long bungim ol samting long wokim nupela haus lotu.

Kamap long dispela blesing lotu tu em ELCPNG nesenel Evanjelism Seketeri Reveren Elymas Bakung na Reveren Ziram Kepusing bilong Busu Peris.

Sanang Zazoring i raitim