BISOP Rozario Menezes, bisop bilong Lae Daiosis, Morobe Provins i yusim lokal redio stesin bilong Katolik Sios long strongim bilip bilong manmeri.

Bisop Menezes i yusim Lae Daiosis Catholic FM 103.7 long autim tok bilong God na mekim ol manmeri i lotu na pre long spirit taim ol i harim lotu long redio.

Em i mekim dispela wok long taim bilong coronvirus (COVID-19) Stet ov Imejensi (SOE).

Em i mekim olsem tu long sapotim ol oda bilong SOE em SOE Kontrola na Polis Komisina David Manning i givim.

Maski manmeri i no save bung na lotu long mun Me, Bisop Menezes i mekim wok olsem ol manmeri i mas kisim tok bilong God long redio.

Bikos long SOE oda sampela bikpela lotu na program olsem semina bilong ol pater long daiosis, Sarap, De bilong Prea, Krisim Misa na Rot bilong Kruse i no bin kamap.

De bilong SOE i pinis long 2 Jun tasol las wik palamen i vot na surukim de i go long narapela 14 de na SOE de bai pinis long 16 Jun.

Tasol gavman i tok bihain long COVID-19 SOE stap bilong manmeri bai i no inap wankain.

Ol bai mas bihainim nupela wei, “new normal.”

Olsem na Bisop Menezes i tok ol manmeri i mas redi long bihainim dispela wei bilong stap we ol i no ken kisim sik.

I no long taim i go pinis Bisop Menezes i go long Menyamya na bungim ol manmeri long dispela bus ples.

Long dispela taim em i tok Jisas Krais bipo long em i go long heven i askim ol disaipel long go long olgeta hap bilong graun na baptaisim ol manmeri long nem bilong Papa, na bilong Pikinini na bilong Holi Spirit long kamap pikinini bilong God.

Em i tokim ol olsem bai olgeta lain manmeri long graun i mas kisim mak bilong Spirit na kamap pikinini bilong God.

Jisas i kam long graun olsem lida, pater na dokta husat i go pas long ol manmeri i lusim rot i go long heven, long skulim ol manmeri long tok bilong God na long oraitim ol manmeri we i sik.

Long wankain wei, ol misineri i skruim dispela wok ol aposel na ol disaipel i bin mekim.

Em i givim Sakramen bilong Konfemasio na Komunio na ol arapela sakramen tu long dispela wokabaut bilong en.