I gat 3,311 Katolik skul insait long Papua Niugini na ol i bin amamasim Nesenel De bilong ol Katolik Tisa long 15 Me long wan wan skul bilong ol wantaim moa long 16,000 Katolik tisa.

AMAMAS: Ol Katolik skul i amamasim de bilong Tisa bilong ol long 15 Me long wan wan hap bilong ol long kantri. POTO: Supplied.

Ezekiel Lawrence i raitim

OL 3,311 Katolik skul long kantri i bin amamasim Nesenel De bilong ol Katolik Tisa long Mande 15 Me long wan wan skul bilong ol wantaim moa long 16,000 Katolik tisa.

Ol tisa i amamas long dispela de long soim wok misin bilong ol long ol Katolik skul, na long wankain taim ol i tingim bek ol bikpela wok ol i save mekim.

Nesenel Kodineta bilong La Salle, Grace Wrakia i toktok long ol Katolik tisa i mas bihainim lekmak bilong Petron Saint John Baptist De La Salle na bringim kwaliti edukesen i go long olgeta pikinini.

Ms Wrakia i strongim ol tisa long ol i no ken lus tingting long veliu bilong Katolik skul, na ol i mas luksave long wok bilong ol olsem ol Katolik tisa.

Legal Opisa bilong Katolik Bisop Konfrens (CBC), Doug Tennent i amamas long gutpela wok ol Katolik tisa i save mekim long skul na komyuniti, na em i strongim ol long ol i mas gohet long ol gutpela wok ol i mekim.

Long wankain taim, Mista Tennent i singaut long ol sumatin i mas harim tok bilong ol tisa, na bihainim gutpela pasin bilong Jisas.

Mista Tennent i toktok strong tu long ol ples i bagarap long ol pipia, na em i singaut long ol Katolik tisa na sumatin i mas sanap wantaim na klinim ples.

Em i tok ol bai lukluk long 4-pela Katolik skul long Nesenel Kapitel Distrik, na wok wantaim ol long klinim ol pablik ples long ol hap ol i makim long en insait long siti.

Em i laikim ol Katolik skul long ol arapela provins tu i mas mekim wankain wok.

PINIS.