Kodineta bilong Morobe Helt Sevis, Sista Patricia Mitiel-Gahanao i tokim ol pipel long lukautim ol helt tim husat bai mekim wok bilong imunaisesen long tripela wik insait long propvins.

OL komyuniti long Morobe i mas lukautim ol helt tim husat i mekim imunaisesen patrol nau long givim sut bilong sik measles, rubella na polio long ol pikinini.

Kodineta bilong Morobe Helt Sevis, Sista Patricia Mitiel-Gahanao i tokim ol pipel long lukautim ol helt tim husat bai mekim wok bilong ol long tripela wik.

“Bipo mipela i bin viktim bilong dispela, we ol pipel i ranim ol nes na sutim ol long ston,” em i tok.

“Plis mi apil long yupela ol komyuniti, ol lida bilong sios, na ol komyuniti. Yupela i mas lukluk gut na protektim ol wokmanmeri bilong mipela husat bai kam long ples bilong yupela o insait long setelmen. Ol bai wokabaut long bus o wanem hap, plis lukluk gut long ol dispela lain.

“Tosave i go long ol yangpela man o husat long ples i mas lukautim gut ol dispela lain, i no ken bagarapim ol. Ol i kam givim gutpela samting. Ol i no kam long bagarapim yupela long komyuniti.”

Morobe i bin statim measles, rubella na polio imunaisesen kempen bilong en long Mande moning long Huonville Praimeri skul graun.

PINIS.