Planti manmeri na ol pikinini tu i save bungim hevi long sik kensa, tasol longpela taim tru i no bin i gat wanpela masin i stap insait long kantri we i ken helpim ol.

Minista bilong Helt na HIV/Aids, Dokta Lino Tom. POTO: Wantok File.

Ezekiel Lawrence i raitim

Moa long 700 man, meri na pikinini i save go long haus sik long hevi bilong sik kensa long olgeta yia.

Bihain long wanpela kensa masin (Radiation masin) bilong PNG i bin bagarap moa long 7-pela krismas, sampela siklain husat i gat mani tasol i save go long narapela kantri long kisim helpim.

Planti manmeri i dai long sik kensa long kantri, tasol i no gat gutpela ripot long namba bilong ol.

Long PNG, sapos wanpela man o meri i kisim dispela sik, ol dokta i save wari tru long wanem, ol i gat save, tasol ol i no gat masin bilong stretim dispela sik.

Ol dokta i save salim planti manmeri go bek long haus, na tokim ol long painim ol arapela rot long helpim ol yet.

Minista bilong Helt na HIV/Aids, Dokta Lino Tom i tok kos bilong skelim sik kensa long liklik mani tasol long kantri olsem Philippines em samting olsem K45,000 na i go antap.

“Sapos sik man o meri i laik mekim tupela sekap, prais i save stap olsem K55,000 o K60,000,” em i tok.

Dokta Lino, husat i bin wok bipo wantaim Wabag Provinsal Helt Atoriti i save raitim pepa bilong ol siklain na salim ol i go long kisim helpim ausait long kantri.

“Antap long kos bilong sekap, balus tiket na ples bilong slip i save bringim mani mak bilong wanpela sik man, i go klostu long K100,000.

Dokta Noah Tapaua i tok kos bilong mekim ‘angiogram’ (sekim lewa na ol rop we blut i save ran long en) long PNG em K2,000, na long mekim STEM sekap em, K5,000.

Siaman bilong Port Moresby General Hospital (PMGH) Bod Projek na Fasilit Komiti, Luke Liria i tok tripela ol laipstail sik i save bagarapim na kilim planti bikpela man na meri long PNG.

Sik long ol hap we blut i save ran long en (coronary heart disease), sik bilong kidney, na kensa em ol sik we i save kilim planti ol man na meri long kantri.

Dokta Lino i tok bihain long em i kisim save long kamap dokta, i no gat gutpela fasiliti long wok long en, na helpim ol sik lain long ol strongpela sik.

Nupela kensa senta long PMGH bai stat operet long 2024, na ol i wetim tasol gavman long tok orait long baset proposal bilong ol long pinisim dispela fasiliti bihainim wol level.