Nupela kensa fasiliti bai helpim tru planti manmeri tasol long wantaim PMGH i laik inap mani long helpim em i kirap na ran gut.

Ezekiel Lawrence i raitim
NUPELA kensa senta bilong Port Moresby General Hospital (PMGH) bai op long pinis bilong 2023, bihainim proposal bilong baset ol i bin salim i go long gavman.

Minista bilong Helt na HIV/Aids, Dokta Lino Tom i tok dispela kensa fasiliti bai helpim tu ol arapela Pasifik ailan kantri long kisim helpim long long sik kensa, Coronary Heart Disease, na sik long kidni.

Long lukim dispela fasiliti i pinis long taim ol i makim long en, PMGH i singaut long gavman long helpim nupela kensa senta bilong kantri wantaim K80,000.

Ol i salim proposal pinis i go long gavman long lukluk long en long 2023 baset.

Long dispela baset, K38 milien bai go long ol kensa masin na ol arapela sapot masin bilong sapotim nupela kensa senta. K25 milien bai go long 191 kensa human risos straksa, na K11 milien baset bai go long ol marasin (drugs and consumable).

Antap long en, PMGH i lukluk tu long kisim tupela nupela masin bilong lukautim na skelim kensa, na ol i toktok pinis long kisim ol dispela masin i kam long kantri long pinis bilong 2023.

Long lukim ol dispela samting i kamap, gavman i mas lukluk long proposal bilong haus sik na putim stret dispela 74 milien kina.

PMGH i putim tu narapela proposal long kisim masin bilong skelim na painimaut ol sik bilong lewa na strok.

Mak bilong dispela proposal em inap K70,000.

PMGH i lukluk tu long kisim ol masin bilong kidni long 2023, we ol i ken mekim kidni operesen tu long bikpela haus sik bilong PNG yet. K13 milien kina i go long baset bilong dispela.

Long ol dispela tripela laipstail sik, PMGH i givim K104 milien proposal long gavman i ken lukluk long en long 2023 baset.

Gavman i givim pinis K25,000 long dispela yia, na PMGH i kisim samting olsem K30,000 helpim tu long Kumul Petroleum Holdings Limited.

Sapos ol dispela proposal i kamap stret, em bai daunim tru hevi bilong moa long 700 manmeri husat i save go long haus sik long kisim helpim long kensa na arapela tupela bikpela sik.

Dokta Lino Tom i husat i bin go lukluk raun wantaim ol hetman bilong helt diptmen long nupela kensa fasiliti, bai toktok wantaim gavman long bung bilong palamen dispela wik long lukluk long baset bilong nupela kensa senta.