Planti manmeri kisim helpim long stretim ai bilong ol aninit long wanpela program bilong Isten Hailans Provinsel Helt Atoriti.

SEKIM AI: Dokta Pahau i operet long ai bilong wanpela man bilong Kainantu long Isten Hailans long Trinde wik i go pinis. POTO: Sape Metta.

 Sape Metta i raitim

Wok bilong kamapim operesen long ai bilong ol manmeri em i no isipela wok.

Ol speselis dokta husat i save i go pas dispela wok na stretim ai bilong ol manmeri long lukluk gut gen em i bikpela samting.

Olsem na long kantri, bikpela namba bilong ol manmeri na sampela ol pikinini tu i gat hevi long ai bilong ol.

Ol i save painim helpim long kisim operesen long han bilong ol speselis dokta na nes.

Hevi bilong ai em i kamap pinis na i stap, na i save gro yet wantaim krismas bilong wanwan manmeri. Olsem na i mas i gat ol rot long stretim dispela hevi.

Isten Hailan em i wanpela provins we i save lukim planti manmeri pulim lain na kamap long ai klinik long Goroka Provinsel Haus long kisim sevis bilong stretim ai bilong ol.

Gutpela wok bilong ol helt wokmanmeri husat i save wok na lukautim ai klinik tu i save mekim planti askim i save kam long ol arapela provins tu.

Dispela i kirapim tingting bilong Isten Hailans Provinsel Helt Atoriti (EHPHA) na ol menesmen i kamap wantaim tingting long kamapim ol progrem we ol wokmanmeri bilong ai i save i go long ol arapela provins na givim sevis long ol pipel long hap.

Sampela long dispela provins em Is na Wes Sepik, Madang na Lae long Momase rijon, Kimbe long Wes Nu Briten, Rabaul long Is Nu Briten na Bouganville long AROB, na long Simbu, Jiwaka na Westen Hailans.

Taim EHPHA i lukim namba i kamap bikpela long provins, em i redim mani long sapotim na lonsim wok bilong ai operesen long Kainantu. Dispela i pulim planti ol manmeri wantaim krismas bilong ol 45 na i go antap long 70 husat ol i go long kisim operesen long stretim ai bilong ol.

Speselis man i go pas long ai operesen long Kainantu em Dokta David Pahau husat i tok olsem, long mekim operesen long wanpela man o meri, i save inap olsem 10 minit. Na klostu long wan handret pesen (100%) bilong ol lain husat i save kisim operese, i save lukluk gut gen.

Rurel ai operesen progrem em i go het yet long Kainantu na bai pinis long tumora (Fraide) bihain long em i bin stat long Mande long wik i go pinis.