5-pela sumatin long Lae Sekenderi Skul i stap nau Switzerland long resis wantaim ol arapela sumatin bilong ol araepal skul long wol long soim save bilong ol long mekim ol samting.

STAP LONG RESIS: Tim i stap redi nau long traim save bilong ol wantaim ol arapela sumatin long wol. POTO: Christopher Raymond FB Page.

Ekseketiv Dairekta bilong Tourism Promotion Authority, Simon Foo i singaut long gavman i mas lukluk long ol resis bilong skul, na sapotim ol sumatin long go aut na lainim ol samting.

Mista Foo i singaut long gavman i mas sapotim ol pikinini moa long saiens na ensinia, na kamapim planti resis long dispela fil long ol pikinini i mas go kamap long intenesenel mak wankain olsem ol sumatin bilong ol narapela kantri. Em i mekim dispela tok bihain long 5-pela sumatin bilong Lae Sekenderi skul long Morobe provins i go long World Robotics salens long Tunde las wik long Geneva, Switzerland

Edministresen bilong skul, na olgeta sumatin i amamas long salim ol dispela sumatin wantaim het tisa bilong skul, Christopher Raymond na ICT tisa, Trevor Eliah, long dispela resis.

Ol dispela 5-pela sumatin em, Lemuel Yalambing, Emmina-Esther Aaron, Sharmila Bandi Simon, Jeanelle Wagambie, na Jael Tioti. Ol bai resis wantaim ol sumatin bilong moa long 190 kantri long tude, 13 – 16 Oktoba dispela yia.

Dispela em bai namba tri taim bilong Lae Sekenderi long salim ol sumatin i go ausait long kantri long resis bilong ol skul.

Mista Eliah, husat i go pas long dispela tim i bilip olsem ol bai lainim planti gutpela samting long dispela resis.

Het tok bilong dispela resis em, ‘Carbon Capture’ o kisim na holim kabon ges.

REDIM OL SAMTING: Ol samting ol i mekim bai bihainim het tok bilong kompetisen long dispela yia. POTO: Christopher Raymond FB Page.

Dispela salens bai lukluk long painim ol rot bilong kisim ‘carbon dioxide’ ges bipo long dispela ges i lus long spes.

Mista Eliah i tok tim bilong em i lukluk long kamapim gutpela rekot long rekot bilong 2018 na 2019.

“Long 2018, Lae Sekenderi i bin resis wantaim 190 kantri, na ol i kam 152 ples. Long 2019, mipela i bin resis wantaim 180 kantri na mipela i kam long namba 76 ples,” Mista Eliah i tok.

 Ol dispela sumatin na tupela tisa bilong ol bai kam bek gen long kantri long narapela wik Trinde, 19 Oktoba.

LUSIM KANTRI: Ol sumatin i lusim kantri long Tunde las wik long go long Geneva, Switzerland. POTO: Christopher Raymond FB Page.