ETEP rurel haus sik long Wasu insait long Tewai Siasi distrik long Morobe provins i kisim K110,000 na ki bilong wanpela nupela embulens long TewaiSiasi Distrik Divelpomen Atoriti long Fraide 5 Novemba long sapotim wok bilong haus sik.

Memba bilong TewaiSiasi, Dokta Kobby Bomareo wantaim ol opisa bilong distrik i givim dispela sapot long haus sik bihain long ol (haus sik) i tok long pasim ol sevis bilong ol long ol sik manmeri. Etep rurel haus sik i stap aninit long PNG Kristen Helt Sevis  (CHS). Nesenel Gavman i luksave long wok CHS i wokim long makim olgeta sios long  givim ol sevis bilong helt long ol rurel ples wantaim wokbung bilong gavman. Dokta Kobby i singaut long CHS long i mas tokaut klia long fanding bilong ol helt fasiliti sios i save lukautim insait long kantri. Long dispela yia, TSDDA  i givim K160,000 long menesmen bilong Etep rurel haus sik na i no long taim liklik ol i givim gen K110,000 na nupela ambulens. Dokta Kobby i tok long dispela mani ol i givim, K70,000 bai go long haus sik, K10,000 bai i go long Etep Mama Helt, K15,000 bai i go long Distrik COVID Kodineta na narapela K15,000 bai i go long Wasu LLG COVID  Kodineta komiti. Olgeta fanding bai stap aninit long lukaut bilong Etep haus sik menesmen. “Fanding bilong distrik em i bilong ol gavman fasiliti tasol distrik na gavman i konsen long helt bilong yupela na i helpim yupela,” Dokta Kobby i tok. Em i singaut long Kristen Helt Sevis na Morobe Provinsal  Helt Atoroti long lukluk long hevi bilong marasin na arapela medikol ikwipmen  i sot long haus sik na stretim bai Etep haus sik i operet. Etep rurel haus sik i pas na ol i lukautim 15 manmeri husat i kisim COVID-19.