PAPUA Niugini i gat Presa Swing Adsopsen (PSA) Oksijen Plent nau i operet long Pot Mosbi Jeneral  Haus sik long mekim oksijen long haus sik yet.

Dispela oksijen plent bai helpim long daunim hevi bilong COVID-19 keis insait long Pot Mosbi. COVID-19 i save bagarapim lewa bilong man meri na save mekim hat long ol i pulim win. “Long mitim diman long hevi bilong COVID-19 insait long PNG, WHO i amamas long sapotim PMGH na Papua Niugini wantaim namba wan PSA oksijen,”  Ekting Kantri Representetiv bilong WHO, Anna Maalsen i tok.

Dispela PSA plent i kamap aninit long wok bung bilong Wol Helt Ogenaisesen na PNG Gavman. Em bai inap long mekim kamap 40 i go 50 silinda long wanpela de. Taim COVID -19 i wok long kamap bikpela insait long kantri, planti sik manmeri i nidim oksijen tasol  PMGH i no inap long mitim nid bilong ol sik lain. Dairekta bilong Medikol Sevis, Dokta Kone Sobi i tok diman bilong oksijen long taim COVID-19 i kamap bikpela i go antap olsem 180 pesen. Olsem tasol, dispela PSA Plent bai helpim long daunim namba bilong ol sik manmeri i kam daun liklik.