PAPUA Niugini i pulap long planti kain kain kaikai bilong gaden na wara. Tasol planti pikinini i save bungim hevi bilong malnutrisen na planti i save dai long dispela hevi.

Malnutrisen i save kamap bikpela long ol pikinini krismas bilong ol i aninit long faivpela yia. Dispela hevi i save kamap taim pikinini i no kisim kaikai i gat rait namba bilong nutriens long em. UNICEF Kantri Representetiv long PNG, Dokta Claudes Kamenga i tok Papua Niugini i gat bikpela number bilong ol pikinini i gat malnutrisen hevi insait long Isten Esia na Pasifik Rijon. “Planti pikinini krismas bilong ol i aninit long faiv yia i soim mak bilong i no gro gut na dispela i mekim PNG i kamap kantri wantaim bikpela namba bilong ol pikinini i gat stantet gro,” Dokta Kamenga i tok. Dokta Kamenga i tok hevi bilong malnutrisen long ol pikinini i save kamapim bikpela hevi  na sampela i save kisim longpela taim na hat taim tru long stretim. Sif Helt Program bilong UNICEF, Andrew Musyok i tok ol pikinini i no save kisim ol kain kaikai i save mekim bodi bilong ol i gro na i save banisim bodi long sik. Ol i kisim wanpela bilong ol kaikai na narapela ol i lusim olsem na dispela bai kamapim malnutrisen. “Ol papa mama i mas save long wanem kain kaikai ol i mas givim pikinini na namba bilong ol wan wan kaikai ol i givim long ol pikinini,” em i tok. Em i tok sampela pikinini i gat sik long bodi bilong ol, olsem na ol mama i mas save long wanem kain kaikai bai ol i kisim long oraitim sik na banisim bodi long sampela arapela sik. UNICEF i wok wantaim gavman na ol arapela dipatmen na kamapim Nesenel Nutrisen Polisi long strongim na daunim hevi bilong malnutrisen long ol pikinini.  Ol i sapotim gavman long givim nutrisen sevis i go long ol skul, helt fasiliti na long komyuniti.

Ezekiel Lawrence i raitim