GAVMAN bilong Saina i sapotim Papua Niugini wantaim K2.78 milien long helpim wok bilong COVID-19 insait long kantri.

Emdaseda bilong Saina long PNG, Zeng Fanhua i givim sek mani long Kontrola bilong Nesenel Pandemik Rispons na Polis Komisina David Manning long las wik Fraide bihainim miting bilong embaseda wantaim Praim Minista James Marape na Helt na HIV/AIDS Minista Jelta Wong. Embeseda Zeng i salim tok sori bilong Saina i kam long PNG long taim kantri i stap insait long hevi bilong nupela taim bilong COVID-19. “Papua Niugini em i gutpela pren bilong Saina. Helpim long taim bilong hevi i save strongim rilesensip bilong tupela kantri,” em i tok. Embaseda Zeng i tok Saina i no lus tingting long taim COVID-19 i kamap namba wan taim long Saina na Praim Minista James Marape i raitim pas na salim tok sori bilong Papua Niugini i go long Presiden Xi Jinping na ol pipel bilong Saina. Long dispela taim, Marape i holim wanpela fanraising na ol pipel na bisnis haus long PNG i givim ol samting bilong helpim hevi bilong COVID-19 long Saina. Embaseda Zeng i tok antap long dispela K2.78 milien Saina i givim long PNG, bai ol i givim tu ol medikol ikwipmen olsem ventileta, oksijen jenereta na oksimita long helpim hevi bilong sik koronavaires long kantri. Embeseda Zeng i tok long 45 yia i go pinis, PNG na Saina i save lukautim gut ol wok bilong ol yet wantaim rispek na sapotim ol yet long ol hevi i save kamap long bagarapim kantri. Tupela kantri i save wokbung long kamapim na strongim bel isi insait long Pasifik rijon. “Pasin poroman bilong Saina na PNG i kamapim planti bikpela samting namel long tupela kantri na ol pipel i kisim palnti gutpela luksave aninit long dispela pasin poroman.” Embeseda Zeng i tok.