OL dokta na helt woka long PNG i tokim ol mama long kantri long tingting gut pastaim long kisim bel long dispela taim we sik COVID-19 i wok long kamap bikpela tru long kantri.

I gat planti belmama i kisim COVID-19 na sampela bilong ol i kisim Delta Variant bilong COVID-19 tu. Wendy Stein, sif ekseketiv opisa (CEO) bilong wanpela NGO grup ol i kolim Spacim Pikinini, i tok ol i laik lukim ol famili i plenim gut wanem taim i seif long kamapim nupela pikinini. “Long nau yet, bai i gutpela long ol mama i wet inap tupela yia pastaim we ol haus sik i stap seif long lukautim ol mama long taim ol i go karim bebi,” em i tok. “Long ol ples, ol helt woka bilong mipela i wok long raun na tokktok wantaim ol mama long maket o long bebi klinik,” em i tok. Mary Sitaing em i wanpela nes na i lukautim wod bilong ol mama i karim long Port Moresby General Hospital. Em i tok tim bilong em i save tokim ol mama long wet inap COVID-19 i pinis na ol i ken tingting long kamapim nupela pikinini. “No ken hariap long karim nupela pikinini. Mipela i save tokim ol mama husat i kam karim bebi hia,”  em i tok. Ol i save givim skul long ol famili i spesim pikinini na putim ol toksave tu long sosel miidia long ol manmeri i ken lukim na skelim. Mary Sitaing it ok COVID-19 inap kamapim bikpela bagarap long ol belmama na bringim ol i go long haus sik. “Long taim mama i laik karim bebi em i mas pulim win gut long helpim em yet wantaim bebi long bel bilong em,” Ms Sitaing i tok. “Na long taim mama i pilim pen bai em i no inap long pulim win gut na dispela i ken mekim bebi i dai long bel bilong mama.” Ol helt woka i laik ol belmama i mas stap seif olsem na ol i tokim ol mama long tingting long kisim veksin bilong banisim ol yet long COVID-19.  Dr Mary Bagita, husat i kodineta bilong Obstetriks yunit long Port Moresby Hospital i tok i gat bikpela salens tru long tokim ol pipel i kisim COVID-19 veksin. “Mipela i traim long mekim ol belmama i luksave long gutpela helpim veksin i ken givim ol. Tasol i no gat planti lain i laik kisim veksin.” Em i tok ol helt woka long tim bilong em i wok long skulim ol mama long gutpela helpim COVID-19 veksin i ken givim long protektim bebi insait long bel bilong ol.

Dubravka Voloder i raitim