APOSTOLIK Nunsio Asbisop Fermin Emilio Sosa Rodriguez i tok ol yangpela i mas strongim gutpela tingting na pasin. Em i tok taim i senis na planti ol gutpela veliu i wok long lus na ol sosaiti i no stap gut.

Em i mekim dispela tok long taim ol sumatin bilong Don Bosco Teknolojikal Institut i soim ol sotpela muvi ol yet i bin mekim na soim long Vision Siti long las wik Sarere. “Mipela i sios na mipela bai strongim sios,” Asbisop Rodriguez i tok. “God em i hop na mipela i mas givim dispela hop i go long ol arapela. “Yupela i mas bringim dispela tok bilong God i go long ol arapela olsem i gat hop long laip. “Yupela inap mekim olsem taim yupela i strongim ol pasin bilong gutpela tingting na stap long laip.”

Ol sumatin i kamapim 110 muvi na soim. Arere long Apostolik Nunsio, ol arapela pater, bruda na sista wantaim ol leimanmeri i bin kamap na lukim ol dispela muvi. Pater Ambrose Pereira husat i Seketeri bilong Komyunikesen na Yut Komisin bilong Katolik Bisop Konprens (CBC) bilong Papua Niugini na Solomon Ailan i bin go pas long dispela festival bilong muvi so.

Isabella Saleui raitim