PRESIDEN bilong Divine Word University Pater Philip Gibbs i bin tokaut klia long pablik olsem Yunivesiti i sapotim COVID-19 veksinesen na i laikim ol sumatin insait long Mandang i kisim veksin tasol ol i no inap fosim olgeta sumatin.

“Mipela i no tok olsem no gat jab bai no gat skul, tasol mipela i bihainim strong COVID-19 protokol i kam long Opis bilong Pandemik Kontrola Dokta Doani Esorom wantaim gavman,” Presiden Phil Gibbs i tok. Em i tok tu olsem DWU i sapotim veksinesen insait long Madang Kempas wantaim COVID-19 ‘Nupela Pasin’  long kamapim seif envaironmen bilong ol sumatin. “Maski planti giaman tok i kamap long sosel midia tasol mipela sanap strong wantaim COVID-19 protokol i kam long pandemik opis na PNG Gavman,” Pater Phil i tok. Em i tokaut klia long ol sumatin i no ken bilipim ol giaman tok long sosel midia bikos dispela i no tru. “Mipela bai sekim ol sumatin i kam bek neks yia long taim bilong rejistresen bikos ol sumatin wantaim veksin kat bai mekim isi tasol ol sumatin no gat veksin kat bai ol go lukim dokta na nes na kisim test pastaim bikos sapos wanpela sumatin i gat COVID-19 mipela bai putim long aisolesen,” em i tok. DWU i no fosim ol sumatin long kisim veksin tasol em helpim sumatin long no ken kisim dispela vaires insait long Madang Kempus. DWU i bihainim disisen bilong Pandemik Kontrola wantaim PNG Gavman long strongim dispela ‘Nupela Pasin’ tasol em i laik bilong wan wan sumatin long kisim veksin. DWU i lukluk gohet neks wantaim wankain namba bilong sumatin long bihainim strong COVID-19 protokol wantaim ol sekyuriti long mein geit.

Jacklyn Kimala i raitim